Łukašenka na pryniaćci hramat pasłoŭ kazaŭ pra «vyklučnaść niekatorych jeŭrapiejskich palitykaŭ»
Ziarniaty idej pra niejkuju «vyklučnaść», pretenzii na «iścinu ŭ apošniaj instancyi» znoŭ dali parastki ŭ rozumach šerahu palitykaŭ. Pra heta zajaviŭ Alaksandr Łukašenka, prymajučy davierčyja hramaty pasłoŭ zamiežnych dziaržaŭ, piša BiełTA.
Źviartajučysia da dypłamataŭ, jon adznačyŭ, što hetaja sustreča adbyvajecca pamiž dźviuma znakavymi, ale procilehłymi pa svajoj sutnaści datami — Mižnarodnym dniom miru, jaki adznačajecca 21 vieraśnia, i 86-j hadavinaj pačatku Druhoj suśvietnaj vajny — 1 vieraśnia.
«Druhoje zdareńnie ja nie ŭzhadvaŭ by ŭ hety ŭračysty momant, kali b nie ŭzmacnieńnie anałohij pamiž ciapierašnimi tryvožnymi tendencyjami i padziejami 30-ch hadoŭ minułaha stahodździa, jakija pryviali da trahičnych nastupstvaŭ dla ŭsioj płaniety, u tym liku i dla Biełarusi», — skazaŭ Alaksandr Łukašenka.
«Na žal, ziarniaty idej pra niejkuju «vyklučnaść», pretenzii na «iścinu ŭ apošniaj instancyi» znoŭ dali parastki ŭ rozumach šerahu palitykaŭ — zachodnich i prazachodnich», — kanstatavaŭ jon.
«Paŭtor historyi ŭ vyhladzie budaŭnictva pasiarod Jeŭropy realnaj «žaleznaj zasłony» byŭ by farsam, kali b nie sankcyjnaja vajna i imklivaja militaryzacyja krain Jeŭrapiejskaha sajuza».
Alaksandr Łukašenka padkreśliŭ, što hetyja pracesy adsunuli navat nie na druhi, a na piaty płan sapraŭdy važnyja i hłabalnyja prablemy: charčovaj, enierhietyčnaj, klimatyčnaj i ekałahičnaj biaśpieki, likvidacyi pryčyn biednaści, niaroŭnaści, nieefiektyŭnaha kiravańnia resursami.
«Pra heta, a taksama inšyja sistemnyja prablemy, u tym liku pra pavyšeńnie roli i efiektyŭnaści AAN, novyja padychody da hłabalnaha kiravańnia, ciapier havorać nie ŭ Jeŭropie, a na inšych placoŭkach», — skazaŭ jon.
U suviazi z hetym jon nahadaŭ pra niadaŭni samit ŠAS u Ciańczini, virtualnuju sustreču BRIKS, mierapryjemstva afrykanskich miždziaržaŭnych abjadnańniaŭ.
«U asobie Biełarusi vy znojdziecie adkaznaha partniora dla pracy jak pa hetym, tak i pa dvuchbakovym paradku dnia», — zapeŭniŭ jon.
Kamientary