Były palitviazień-student čatyry hady nie prasiŭ pra dapamohu. Ale ciapier stračanaje zdaroŭje zmusiła

Były palitźniavoleny paśla turmy, emihracyi i doŭhaha pieryjadu stresu apynuŭsia ŭ ciažkim psichałahičnym stanie: u jaho dyjahnastavanyja tryvožna-depresiŭny razład i PTSR. Zaraz jamu patrebna dapamoha na lačeńnie i arendu žylla, kab adnavicca i znoŭ mieć mahčymaść pracavać, piša Fond salidarnaści «Bajsoł».

Hieroj znachodzicca ŭ vielmi ŭraźlivym psichałahičnym stanie, a jaho svajaki — pad ciskam z boku siłavikoŭ, tamu na «Bajsole» schavali jaho imia i niekatoryja padrabiaznaści historyi*.

«Vitaju. Adrazu skažu, što raśpisać heta było nievierahodna składana dla mianie. Ja — były palityčny źniavoleny. Dziesiać razoŭ ja pisaŭ i ściraŭ hety tekst. Mnie nievynosna ciažka prasić ab dapamozie. Ale jašče horš budzie nie paprasić ab joj.

U mianie źmiešany tryvožna-depresiŭny razład i PTSR, i pryznačanyja leki pakul nie padziejničali. Psichijatr papiaredziła, što mnie nastojliva patrebny spakoj, što terapija budzie doŭžycca doŭha i nieabchodnyja indyvidualnyja psichałahičnyja sieansy minimum na hod.

Jak ja apynuŭsia ŭ hetaj kropcy?

U 2020 hodzie ja byŭ zatrymany ŭ Minsku za toje, što braŭ udzieł u studenckich i hramadzianskich mirnych pratestach paśla prezidenckich vybaraŭ. Mianie pryciahnuli da kryminalnaj adkaznaści pa artykule 342 KK RB («arhanizacyja albo ŭdzieł u dziejańniach, jakija hruba parušajuć hramadski paradak»).

Paśla vychadu z turmy ŭ 2022 hodzie ja nie źviartaŭsia ni da kaho pa psichałahičnuju dapamohu praź pieražytoje, bo nie daviaraŭ inšym ludziam. Akramia taho, ja dumaŭ, što, źviartajučysia pa dapamohu, budu vyhladać słabym i razam z hetym adbirać resursy ŭ tych, chto paciarpieŭ macniej.

Adbyŭšy ŭvieś termin i apynuŭšysia na voli, ja byŭ vymušany emihravać u Jeŭropu. Zatrymańnie, turma, emihracyja: kab zahłušyć bol ad uspaminaŭ pracaj, ja praciahvaŭ być aktyŭnym. U dadatak, heta davała mnie ŭśviedamleńnie taho, što ja nie zdaŭsia. U hety čas ja pačaŭ pracavać u adnym ź biełaruskich niezaležnych ŚMI — pisaŭ roznyja materyjały pad psieŭdanimam. U sakaviku 2025 hoda majo supracoŭnictva ź imi skončyłasia praź finansavyja pryčyny.

Ja byŭ upeŭnieny, što žurnalisckaja dziejnaść i hramadskaja aktyŭnaść dapamohuć pieražyć toje, što sa mnoj zdaryłasia. Ale žurnalistyka jak praca vielmi źviazanaja sa stresam praź vielizarnuju kolkaść niehatyŭnych navin (asabliva tych, što tyčacca represij u Biełarusi), i, vidać, ja tolki adsoŭvaŭ (i navat uzmacniaŭ) moj posttraŭmatyčny sindrom paśla turmy.

Z momantu zvalnieńnia ja šmat miesiacaŭ jak moh šukaŭ novuju pracu, ale biespaśpiachova. Taki doŭhi pieryjad niestabilnaści i biespracoŭja, a taksama zapazyčanaść pa apłacie arendy žylla, jakaja ŭźnikła, jašče bolš pahoršyli moj mientalny stan. U kancy kastryčnika 2025 hoda praz uśviedamleńnie adsutnaści luboj enierhii na vučobu i elemientarnyja bytavyja spravy mnie pryjšłosia źviarnucca va ŭniviersitet, dzie ja vučusia, i mnie dapamahli zapisacca i dajści da psichijatra. Tak ja daviedaŭsia pra svoj dyjahnaz.

Mnie patrebna vaša dapamoha, kab vybracca z hetaha zamknionaha koła. Kab mieć siły i mahčymaść pracavać, mnie treba vyzdaravieć, a kab vyzdaravieć, mnie patrebnyja srodki na čas lačeńnia — na arendu, leki i vizity da lekara. Luby vaš uniosak nablizić majo vyzdaraŭleńnie».

Suma zboru

€2800

€1800 — 2 miesiacy arendy žylla

€1000 — 20 sieansaŭ indyvidualnaj terapii

Padtrymać byłoha palitviaźnia možna pa spasyłcy.

• 4
• 1
• 1
• 2
• 1
• 24
• 0
• 6