Lubaja procivaha imperyi – biassprečny plus. Piša Alaksandar Kłaskoŭski.
Lubaja procivaha imperyi – biassprečny plus. Piša Alaksandar Kłaskoŭski.
Niadaŭni Čavesaŭ vizyt zdavaŭsia vyklučna prapahandysckim blefam, a voś hladziecie ž! Spadary Šejman i Siamaška ŭžo ŭ Karakasie. Kiraŭnik Rady biaśpieki dy pieršy vice-premjer – tandem surjozny.
Chto-kolviek kpiŭ: moža, trubu praz Atlantyku prakładać budziem? Ale palitolah Andrej Fiodaraŭ kaža: «Nie abaviazkova, kab taja nafta fizyčna pierapampoŭvałasia ŭ Biełaruś. Jość roznyja zalikovyja schiemy». Ekspert Jury Šaŭcoŭ davodzić, što zdabytaje biełarusami ŭ Venesuele «čornaje zołata» možna z vyhadaj pradavać Štatam ci navat Kitaju. Jość miž Mienskam dy Karakasam hleba i dla inšych hiešeftaŭ.
Zrešty, niezaležna ad ekanamičnaha efektu, symptamatyčna vyhladaje sama tendencyja. Paradaksalnym čynam, z-pad pałki «Hazpromu», ajčynnaje kiraŭnictva musić napaŭniać realnym źmiestam zašmalcavanuju tezu pra šmatvektarnuju palityku. Sprava zusim nie abmiažoŭvajecca «lihaj dyktataraŭ». Ci ŭjaŭlałasia kolki hadoŭ tamu, na piku «bratniaha jadnańnia» z Rasiejaj, što bolej za pałovu ekspartu pojdzie ŭ Eŭraźviaz?
A jak vam namiok na toje, što darahaja zamova na prajektavańnie AES moža dastacca nie maskoŭcam, a francuzam? Mienavita taki mesydž zrabiŭ Alaksandar Łukašenka padčas vizytu ŭ Pinsk. Tam ža było skazana i pra cikavyja prapanovy z Karakasu.
Sa «stalicy Paleśsia» pa Maskvie byŭ zrobleny papieradžalny załp. Nie vypadkovaja zhadka pra tych, chto razam z rasiejcami hinuŭ niekali ŭ akopach. Heta litaralny paŭtor rytoryki lutaha 2004 hodu, kali Łukašenka adbivaŭ hazavy blickryh Maskvy. Miensk demanstruje maralnuju hatovaść da novaj bitvy.
A masa padtrymaje. Pad 80% biełarusaŭ ličać, što «Biełtranshaz» nielha pradavać ni pry jakich umovach.
Na dumku ekanamista Jarasłava Ramančuka, Rasieja svaim šantažom moža zrabić tutejšamu načalstvu pasłuhu. Na imperyju zručna śpisać i tak daŭno naśpiełaje rezkaje padvyšeńnie žyllova-kamunalnych taryfaŭ. Jak ni paradaksalna, hety niepapularny krok, miarkuje ekspert, moža stać «mahutnym čyńnikam eskalacyi ekanamičnaha dy palityčnaha nacyjanalizmu».
Darečy, ci zaŭvažyli: na niadaŭniaj naradzie z pasłami aficyjny lider faktyčna reabilitavaŭ ideju Bałta-Čarnamorskaha kalektaru. BNF moh by hanarycca. Ale nacyjanał-demakraty ŭsio adno bjuć u zvany, pieraścierahajučy ad pahłynalnaha referendumu.
Peŭnyja pasažy ŭ tym ža Pinsku sapraŭdy hučali dvuchsensoŭna. Naprykład, što pry peŭnych umovach imavierny pierachod na rasiejski rubiel. Zrešty, heta moža być rytualnym zaklinańniem. Chaj rasiejcy čakajuć la mora pahody. A my spakvala naładzim intehracyju praz akijan. Tyja, prynamsi, nie inkarparujuć: dalekavata!
Možna, viadoma, pakpić: daabdymalisia z rasiejskim miadźviedziem, schamianulisia, jak kości chrabusnuli... A raptam Čaves vaš naftavy biznes potym nacyjanalizuje – jon na heta mastak!
Ale varta pamiatać, što lubaja procivaha imperyi – niesumnienny plus. Zachodniaja ž supolnaść, vyjaviŭšy peŭny spryt, moža skarystać zmušany drejf režymu na karyść demakratyčnaj perspektyvy Biełarusi.
Kamientary