Učora Łatvija źmianiła praviły pierasiačeńnia miažy. Biełarusy sutyknulisia ź pieršymi ciažkaściami
Z 15 kastryčnika Łatvija źmianiła praviły pierasiačeńnia miažy ź Biełaruśsiu i Rasijaj. Kali ścisła, to ciapier pierad prachodžańniem miažy treba rehistravacca ŭ elektronnaj čarzie. Pasłuha płatnaja (9,3 jeŭra). Anłajn-braniravańnie adbyvajecca praz peŭny sajt. Ale, jak paviedamlaje adzin z našych čytačoŭ, u pieršy ž dzień dziejańnia novaŭviadzieńnia jon sutyknuŭsia z prablemaj, piša Onliner.
— Faktyčna situacyja na miažy Łatvija — Biełaruś (pamiežny pierachod «Paternijeki») takaja: pa žyvoj čarzie, biez rehistracyi ŭ sistemie braniravańnia, nie prapuskajuć. Adnak najbližejšaja data dla braniravańnia tolki praz tydzień, 22 kastryčnika.
Atrymlivajecca, što na miažy niama nivodnaj mašyny, ale chto pryjechaŭ biez broni — tych nie prapuskajuć pamiežniki i adpraŭlajuć u elektronnuju čarhu, zhodna ź jakoj najbližejšaja dastupnaja data — tolki praz tydzień. Majo mierkavańnie: łatvijski bok faktyčna zakryŭ miažu.
Pierachodzim na sajt z anłajn-broniaj u čarzie na miažy. I sapraŭdy: najbližejšaje dastupnaje «akienca» — 03:00—04:00 22 kastryčnika.
Ci ŭsie astatnija daty razabrali? Nieviadoma. Zhodna z sajtam DPK, čarha ŭ punkcie propusku «Hryharoŭščyna» pa stanie na 10:00 16 kastryčnika — 0 mašyn.
U tematyčnych čatach karystalniki taksama skardziacca na adsutnaść časovych słotaŭ u sistemie anłajn-braniravańnia. U adkaz im rekamiendujuć jechać praź Litvu.
Łatvija zabaraniła ŭjezd lehkavych aŭtamabilaŭ ź biełaruskaj rehistracyjaj z 16 lipienia 2024 hoda. A z 1 studzienia 2025 hoda aŭtamabili, zarehistravanyja za miežami Jeŭrapiejskaha sajuza, Jeŭrapiejskaj ekanamičnaj zony i Šviejcaryi, pavinny być zadekłaravanyja anłajn pierad ujezdam u Łatviju.
Kamientary