U Polščy raskazali padrabiaznaści pra spravu rasijskaha apazicyjaniera, jaki akazaŭsia špijonam
Źjavilisia novyja padrabiaznaści pa spravie hramadzianina Rasii Ihara Rohava. Jon atrymaŭ u Polščy palityčny prytułak, mieŭ stypiendyju i žyllo ad polskaj dziaržavy, ale ŭ vyniku akazaŭsia zasłanym špijonam, piša vydańnie Wiadomości sa spasyłkaj na sudovyja materyjały.
Ihar Rohaŭ pryjechaŭ u Polšču paśla pačatku rasijskaj ahresii suprać Ukrainy, spasyłajučysia na pahrozu dla jaho prymusovaha pryzyvu ŭ vojska i ŭdziełu ŭ vajnie. Ihar i jahonaja žonka Iryna Rohava byli pryniatyja ŭ krainie praz aficyjnyja zaprašeńni polskaha MZS.
U Polščy były apazicyjny aktyvist z Saranska praciahvaŭ navučańnie ŭ halinie infarmacyjnych technałohij i atrymlivaŭ stypiendyju kala 5 tysiač złotych (kala 1370 dalaraŭ) u miesiac, a taksama žyllo ŭ domie studenta ŭ horadzie Sasnoviec.
Ihar Rohaŭ prezientavaŭ siabie jak rasijski apazicyjanier, jon užo padčas emihracyi arhanizoŭvaŭ mitynhi suprać ułady Pucina ŭ Silezii i aktyŭna dapamahaŭ rasijskim uciekačam u Polščy. Mužčyna tłumačyŭ, što dziejničaje, kirujučysia maralnymi mierkavańniami, i choča «rabić dabro». Faktyčna, adnak, jon vykonvaŭ zadańni FSB Rasii.
Pa danych śledstva, Ihar Rohaŭ byŭ zavierbavany FSB jašče ŭ pačatku svajoj vučoby ŭ Rasii. Jon rychtavaŭ dla śpiecsłužby spravazdačy pra roznyja kanfierencyi i dziejnaść apazicyjnaj arhanizacyi «Adkrytaja Rasija». Dla suviazi z kurataram z FSB, imia jakoha Jaŭhienij (mahčyma, jon mieŭ proźviščam abo psieŭdanimam «Jaŭhienij Litko»), Rohaŭ karystaŭsia prostym knopkavym telefonam, kab nie vyklikać padazreńniaŭ.
Budučy za miažoj, Rohaŭ pieradavaŭ danyja pra polskich čynoŭnikaŭ, jakija padtrymlivali rasijskuju apazicyju, prahramy Nacyjanalnaha ahienctva akademičnaha abmienu, a taksama vykładčykaŭ Silezskaha ŭniviersiteta, jakija navučali ruskamoŭnych uciekačoŭ. Pavodle jaho pakazańniaŭ, jon tolki sprabavaŭ pieradać hetuju infarmacyju, ale danyja da adrasata nibyta tak i nie dajšli.
Taksama Rohaŭ byŭ atrymalnikam kurjerskaj pasyłki z elemientami kumulatyŭnaj bomby: uzryvalniki, vybuchovy materyjał i błok siłkavańnia. Pasyłka była adpraŭlenaja z Ukrainy madellu Kryścinaj S., jakaja ŭžo była asudžanaja.
Ihar Rohaŭ śćviardžaŭ, što prosta dapamahaŭ znajomamu, nie viedajučy źmieściva. Adnak śledčyja znajšli na jahonym telefonie padazronyja fatahrafii trubapravodaŭ u Sasnoŭcy i inšych abjektaŭ.
Žonka mužčyny, Iryna Rohava, spačatku aficyjna padtrymlivała muža paśla jaho aryštu, nazyvajučy ŭsio, što adbyvajecca, pamyłkaj polskich słužbaŭ abo rasijskaj intryhaj. Adnak paśla ŭ pryvatnych razmovach jana raskryła, što Ihar niekalki hadoŭ supracoŭničaŭ z FSB praz kuratara Jaŭhienija. Da taho ž u pakazańniach sužoncaŭ byli supiarečnaści, što dazvoliła śledstvu dakazać špijonskuju dziejnaść.
Ihar Rohaŭ u svaich pakazańniach padkreśliŭ, što dziejničaŭ z bojazi i pad ciskam: FSB, maŭlaŭ, pahražała jamu i jahonaj siamji. Baćku špijona nibyta pahražali pryzvać na vajnu. Dla pieradačy infarmacyi jon vykarystoŭvaŭ šyfravanyja paviedamleńni praz Telegram, jakija maskiravalisia pad zvyčajnyja zahady, naprykład, pra «častki aŭtamabila».
Polskaja prakuratura i Ahienctva ŭnutranaj biaśpieki abvinavačvajuć Ihara i Irynu Rohavych u špijanažy i pieradačy danych, što mahli škodzić Polščy. Kali ich vina budzie dakazana, to aboim pahražaje ad 8 hadoŭ da pažyćciovaha źniavoleńnia. Pieršaje pasiadžeńnie suda pryznačana na 8 śniežnia ŭ Sasnoŭcy.
Sprava Ihara Rohava zaśviedčyła niedachopy ŭ polskaj vizavaj palitycy. Jašče ŭ 2022 hodzie śpiecsłužby papiaredžvali MZS i ŭrad pra ryzyku ŭjezdu ŭ krainu rasijan, jakija mahli być źviazanyja z raźviedkaj abo kryminalnymi hrupami. Adnak realnych dziejańniaŭ pa ŭviadzieńni abmiežavańniaŭ abo źmienach u pracedury zroblena nie było.
Aktyvist «Adkrytaj Rasii» z Saranska Ihar Rohaŭ viadomy siarod inšaha tym, što byŭ zatrymany ŭ Minsku ŭ žniŭni 2020 hoda, kali razam ź inšym supracoŭnikam «Adkrytaj Rasii» Arciomam Važankovym pryjechaŭ panazirać za biełaruskimi vybarami i nastupnymi pratestami.
Ź imi tady było źniata videa, ź jakoha vynikała, što maładych ludziej źbivali, staviačy im u vinu arhanizacyju masavych biesparadkaŭ. Apieratar rabiŭ akcent, što ŭ zatrymanych majucca tatuiroŭki i sudzimaści.
Rasijskaha apazicyjaniera zatrymali ŭ Varšavie za špijanaž
U zatrymanaha ŭ Polščy taksista-špijona znajšli śpis biełarusaŭ, za jakimi jon mieŭ zadańnie sačyć
Paśla aryštu taksista-špijona polskija śpiecsłužby masava ciahajuć biełarusaŭ na dopyty
U Jeŭropie vykryli biełaruskuju špijonskuju sietku. Aryštavali byłoha kiraŭnika małdaŭskaj kontrraźviedki
Kamientary
Prosta jak 2×2 .