U Mahilovie pradajuć bielvieder na dachu stalinki: 15 kvadrataŭ i 24 akny z usich bakoŭ
U Mahilovie vystaŭleny na prodaž sapraŭdy ŭnikalny abjekt — vieža-bielvieder na dachu žyłoha doma 1954 hoda pabudovy, jaki jość adnym ź niešmatlikich u horadzie prykładaŭ paślavajennaj savieckaj nieakłasiki.
Dom raźmieščany pa adrasie vulica Pieršamajskaja, 46, na skryžavańni ź Cimirazieŭskaj — nasuprać Minskaha rynku i sabora Troch Śviacicielaŭ. U budynku žyŭ viadomy akcior i režysior Valancin Jermałovič, pra što śviedčyć pamiatnaja doška na fasadzie.
Bielviederam nazyvajecca nadbudova ŭ vyhladzie viežy ź vialikimi akonnymi prajomami, praź jakija možna ahladać navakolle. Jany časta ŭpryhožvajuć stalinki ŭ miescach, dzie architektary imknulisia stvaryć kampazicyjnuju daminantu. Naprykład, viadomy bielvieder budynka KDB u Minsku — tak zvanaja vieža Canavy — zamykaje pierśpiektyvu bulvara pa Kamsamolskaj vulicy.
Abjekt prapanuje nabyć kampanija Savmet, jakaja bačyć u hetym pamiaškańni patencyjał dla samych roznych idej — ad panaramnaha łaŭnža abo vinnaha bara ź vidami na Mahiloŭ da stylnaj majsterni, šoŭruma abo haściavoha doma premium-kłasa. Pamiaškańni ŭžo sprabavali pradać u 2017 hodzie, ale biespaśpiachova.
Ahulnaja płošča kvatery ź bielviederam składaje 47 m², adnak jana padzielena pamiž tryma ŭzroŭniami. Uvachod znachodzicca ź piataha pavierchu, dzie niama voknaŭ, a značnuju častku płoščy zajmaje leśvica. Na siarednim, šostym paviersie, jość dva nievialikija akny pad samaj stollu — na vyšyni amal 4 mietraŭ, ale i tam šmat miesca źjadaje leśvica, jakaja viadzie ź nižniaha ŭzroŭniu.
Kab padniacca va ŭłasna bielvieder — na vierchni jarus — treba skarystacca krutoj mietaličnaj leśvicaj i praleźci praź luk u stoli. Mahčyma, usie hetyja pierachody možna było b zamianić adnoj kampaktnaj vintavoj leśvicaj.
Płošča vierchniaha pamiaškańnia ścipłaja — usiaho 15 m², ale vyšynia stoli dasiahaje 5,6 mietra. Asablivaściu bielviedera źjaŭlajecca toje, što na kožnaj z vaśmi ścien raźmieščany pa try akny — dziakujučy hetamu ź viaršyni adkryvajecca panaramny vid na centr Mahilova.
Kampanija taksama prapanoŭvaje mahčymaść pašyreńnia da 200 m² na druhim uzroŭni. Pavodle čarciažoŭ, heta pašyreńnie na šostym paviersie prapanujecca zrabić za košt paddaškavaj prastory.
Adnak kab ažyćciavić taki prajekt, pryjdziecca achviaravać histaryčnym vyhladam doma — źniščyć balustradu i ŭźvieści ścieny nad ciapierašnim karnizam prykładna na dva mietry.
Abjekt acenieny ŭ 52 tysiačy dalaraŭ. U kamplekcie z prodažam prapanujucca płaniroŭka i prykłady mahčymych dyzajnierskich rašeńniaŭ — vidavočna, zhienieravanych niejrasietkaj.
«Naša Niva» — bastyjon biełaruščyny
PADTRYMAĆBiełaruski biznesmien adnaŭlaje histaryčny pałac Lubamirskich u Biełastoku. Tam budzie hatel i restaran
Uładalnik «Majontka Padarosk» ličyć niezakonnym aŭkcyjon pa prodažy siadziby. Jon nakiravaŭ pretenziju ŭ rajvykankam
Siadziba Jalenskich u Kleckim rajonie, jakuju pradavali dvojčy, znoŭ šukaje haspadara
U byłym klaštary biernardynaŭ u Dubroŭnie budzie stamatałohija, aryjentavanaja na zamiežnikaŭ
Kamientary
Zaraz takoje nie kupiš. Niemetazhodna.