Siamja byłoha dyrektara FSB Patrušava skupiła nieruchomaści na $175 miljonaŭ
Heta rekord siarod rasijskich siłavikoŭ.
Ahulny košt damoŭ i kvater, jakimi vałodaje siamja najbližejšaha paplečnika Uładzimira Pucina i byłoha dyrektara FSB Mikałaja Patrušava, pieravyšaje 175 młn dalaraŭ, padličyŭ «Prajekt» u ramkach daśledavańnia «Baćki i dziady». Heta padobna na rekord siarod rasijskich siłavikoŭ.
Značnaja častka nieruchomaści zapisanaja na Marynu Arciemjevu — tajemnuju žonku vice-premjera Dźmitryja Patrušava, jakaja nikoli nie źjaŭlałasia ŭ antykarupcyjnych dekłaracyjach čynoŭnika, paviedamlaje «Ahienctva».
Arciem'eva vałodaje nieruchomaściu koštam kala 80 młn dalaraŭ, padličyŭ «Prajekt». Siarod jaje aktyvaŭ: dźvie kvatery ŭ ŽK «Załaty» nasuprać Kramla (9,3 młn dalaraŭ), učastak u 40 sotak u Siarebranym Bary (35 młn), učastak u 70 sotak u padmaskoŭnaj Iście (sumiesna z byłoj žonkaj Mikałaja Patrušava Alenaj, 25 młn), a taksama abjekty kamiercyjnaj nieruchomaści ŭ biźnies-centrach «Maskva-sici», «Łotas» i «Vodny» ahulnaj koštam 6 młn dalaraŭ.
Chto takaja Arciem'eva? Heta samy małaprykmietny člen siamji Patrušavych. Jana nie ŭziała proźvišča svajho muža — vice-premjera Dźmitryja Patrušava — i nikoli nie była zamužam ź im aficyjna, adnak naradziła jamu ŭžo piaciarych dziaciej.
Da znajomstva z Patrušavym-małodšym Maryna žyła vielmi biedna. Jana naradziłasia ŭ niapoŭnaj siamji, dziacinstva i junactva praviała ŭ adnapakajovaj chruščoŭcy ŭ Elektrastali, dzie žyła razam z maci i siastroj. Z kanca 90‑ch Arciem'eva sprabavała svaje siły ŭ Maskvie — na niaznačnych pasadach u maleńkich kampanijach.
Sustreča, jakaja źmianiła žyćcio 35‑hadovaj Maryny, adbyłasia ŭ 2009 hodzie. Užo praz hod žančyna naradziła pieršaje dzicia, jakoha ŭ honar pradzieda nazvali Płatonam. Paśla naradžeńnia pieršynca jana stała hiendyrektaram telekanała pra modu World Fashion, dzie da hetaha pracavała zvyčajnym pradziusaram. A praź dzień paśla naradžeńnia druhoha dziciaci miljarder Ihar Kiesajeŭ, «kašalok» siamji Patrušavych, pierapisaŭ na jaje i vałodańnie telekanałam (80% naležała Arciem'evaj da lutaha 2018 hoda).
U vyniku nijakaha modnaha biźniesu ŭ Arciem'evaj nie vyjšła, i ciapier WFC — heta pa sutnaści rasijski veb-sajt pra modu. Adnak pravał u modnym biźniesie nie paŭpłyvaŭ na imklivuju karjeru pradprymalnicy Arciem'evaj. Na praciahu nastupnych hadoŭ maładaja žančyna stała ŭłaśnicaj dziasiatka kampanij.
Nabyvać nieruchomyja aktyvy joj dapamahała pazicyja muža. U 2021 hodzie «Raśsielhasbank», nahladny saviet jakoha ŭznačalvaŭ Patrušaŭ-małodšy, vydaŭ joj ipateku na 700 tysiač jeŭra pad 2% hadavych dla pakupki nieruchomaści kala Kramla. Pry hetym ipatečnyja staŭki na toj momant składali 9% hadavych, a ŭ zamiežnaj valucie takija kredyty amal nie davali paśla 2014 hoda.
Na kaho jašče zapisana majomaść Patrušavych? Ułasnaść siamji na 50 młn dalaraŭ aformlena na byłuju žonku Mikałaja Patrušava Alenu — doktara-piensijanierku. Akramia sumiesnaha z Arciem'evaj učastku ŭ Iście, joj naležyć asabniak u Siarebranym Bary z učastkam płoščaj 45 sotak.
Inšaj niaviestcy byłoha dyrektara FSB, Taćcianie Patrušavaj, naležać dva damy na Navaryžskaj šašy ŭ vioscy Zacharava (25 młn dalaraŭ) i try kvatery ŭ elitnym kłubnym domie «Krastoŭski 10» (8,5 młn).
Stali viadomyja padrabiaznaści taho, jak u Vjetnamie zatrymali Vieramiejčyka21
Kamientary