Aryhinalnaja bietonnaja carkva na Teneryfie pryznana najlepšym budynkam hoda ŭ śviecie

Na prestyžnym Suśvietnym architekturnym fiestyvali (World Architecture Festival, WAF) byli abvieščany pieramožcy. Hałoŭnuju ŭznaharodu (tytuł «Suśvietny budynak hoda») atrymaŭ niezvyčajny prajekt — Carkva Zbaviciela i hramadski centr u Łas-Čumbieras na ispanskim vostravie Teneryfie, stvoranyja architektaram Fiernanda Mienisam.

Pavialičyć

Prajekt staŭ častkaj prahramy adradžeńnia zaniadbanaha pryharada. Jon uklučaje ŭ siabie nie tolki carkvu, ale i hramadski centr z płoščaj, jakija stali miescam sustreč dla miascovych žycharoŭ. Cikava, što budaŭnictva finansavałasia za košt nievialikich achviaravańniaŭ, tamu praces zaciahnuŭsia na doŭhija 18 hadoŭ: pieršyja dva błoki byli ŭźviedzieny chutka, a astatnija dabudavali tolki ŭ 2021 hodzie, kali ŭdałosia sabrać nieabchodnyja srodki. Ahulny biudžet skłaŭ kala 2 miljonaŭ jeŭra.

Pavialičyć

Źniešni vyhlad budynka daloki ad tradycyjnych ujaŭleńniaŭ pra carkvu. Asablivaja rysa prajekta — vuzkija «raskoliny» ŭ ścienach, zapoŭnienyja skulpturnymi elemientami ź mietału i škła. Praź ich unutr pranikaje dzionnaje śviatło, stvarajučy ŭražlivuju hulniu śviatła i cieniu i ažyŭlajučy manalitnuju bietonnuju prastoru.

Pavialičyć

Pavodle infarmacyi z sajta fiestyvalu, ścieny hetaj carkvy zroblenyja ź bietonu, jaki vykonvaje adrazu niekalki zadač. Pa-pieršaje, toŭstyja bietonnyja ścieny pracujuć jak termas: letam jany zachoŭvajuć unutry prachałodu, a ŭ chałodny čas — ciapło. Ale samaje hałoŭnaje — heta huk.

Pavialičyć

Kab pazbavicca ad recha, architektary ŭźviali častku ścien, dadaŭšy ŭ bieton drobnyja kavałački miascovaj vułkaničnaj parody. Takaja pavierchnia stała šurpataj i, niby hubka, pačała pahłynać lišni huk. U spałučeńni ź inšymi, bolš hładkimi ścienami, heta dazvoliła stvaryć idealnuju akustyku, dziakujučy jakoj i hołas, i śpieŭ hučać vielmi čysta i vyrazna.

Fiestyval, jaki sioleta prajšoŭ u Majami-Bič (ZŠA), taksama adznačyŭ pieramožcaŭ u inšych klučavych naminacyjach:

Interjer hoda

U hetaj naminacyi pieramožcam taksama stała kultavaje zbudavańnie — Fraktalnaja kaplica ŭ aŭstryjskim Hracy ad Innocad Architecture. Raźmieščanaja ŭ dziaržaŭnaj balnicy, jana słužyć cichim miescam dla rozdumu dla pacyjentaŭ, piersanału i naviedvalnikaŭ.

Pavialičyć

Jaje dyzajn zasnavany na sučasnych daśledavańniach u halinie nieŭrałohii i ekałahičnaj psichałohii i robić akcent na vykarystańni dzionnaha śviatła dla stvareńnia spakojnaj atmaśfiery, palapšeńnia samaadčuvańnia i źnižeńnia stresu.

Centralnaje miesca ŭ dyzajnie zajmajuć fraktalnyja ŭzory. Navukova dakazana: razhladańnie takich pryrodnych uzoraŭ supakojvaje čałavieka i moža źnizić uzrovień stresu na 60%. Hetuju ideju pieršapačatkova vykarystoŭvali ŭ NASA, kab dapamahčy astranaŭtam zmahacca sa stresam u kosmasie.

Pavialičyć

Kab stvaryć uzory dla kaplicy, dyzajniery razam z navukoŭcami vykarystoŭvali śpiecyjalnuju kampjutarnuju prahramu. Jana dapamahła znajści idealny bałans, kab uzory byli adnačasova i pryhožymi dla voka, i karysnymi dla psichiki.

Pavialičyć

Daśledavańni, apublikavanyja ŭ časopisie Frontiers in Psychology, paćvierdzili, što taki dyzajn dobra ŭpłyvaje na samych roznych ludziej, u tym liku na tych, chto vielmi adčuvalny da navakolnaha asiarodździa. Heta robić kaplicu kamfortnym i spakojnym miescam absalutna dla kožnaha.

Prajekt hoda 

Najlepšym suśvietnym budučym prajektam (Future Project) nazvany prajekt mižnarodnaha aeraporta Bielefu ŭ Butanie. Jaho aŭtaram źjaŭlajecca Bjarke Ingels Group.

Pavialičyć

Terminał budzie pabudavany z ekałahičnaj miascovaj draŭniny, a jaho efiektnaja rombapadobnaja kanstrukcyja budzie ŭpryhožana tradycyjnaj butanskaj raźboj pa drevie. Aeraport płanujecca adkryć u 2029 hodzie.

Pavialičyć

Adaptavany da subtrapičnaha klimatu paŭdniovaha Butana, aeraport vykarystoŭvaje naturalnyja sposaby achałodžvańnia, zasnavanyja na tradycyjnaj architektury. Draŭlanaja kanstrukcyja dapamahaje rehulavać vilhotnaść u pamiaškańni, a vientylavanyja dachi i ŭnutranyja dvoryki spryjajuć cyrkulacyi pavietra. Pašyranyja karnizy zabiaśpiečvajuć cień i abaronu ad musonnych daždžoŭ.

Pavialičyć

Łandšaft hoda

U hetaj naminacyi pieramoh prajekt «Nasustrač pavodcy: ekałahičny kalidor raki Sińczian» ad Turenscape u Kitai.

Architektary pieratvaryli zaniadbanuju terytoryju la raki, jakaja rehularna zataplałasia i była niebiaśpiečnaj dla žycharoŭ, u rekreacyjnuju zonu. Zamiest taho, kab budavać vysokija damby i zmahacca z vadoj, na 102 hiektarach prablemnaj ziamli byŭ stvorany ŭnikalny park.

Pavialičyć

Hałoŭnaja ideja prajekta — nie supraćstajać siezonnym pavodkam, a vykarystoŭvać ich jak stvaralnuju siłu, jakaja žyvić łandšaft, adnaŭlaje pryrodnaje asiarodździe i padtrymlivaje bijaraznastajnaść.

Dla hetaha ŭvieś łandšaft pierarabili: stvaryli sistemu sažałak i astraŭkoŭ, jakija pracujuć jak hihanckaja hubka — ubirajuć lišniuju vadu padčas pavodak i pastupova addajuć jaje ŭ zasušlivy pieryjad. Kab ludzi mahli karystacca parkam kruhły hod, była pabudavanaja razumnaja dvuchjarusnaja sistema darožak. Vierchni ŭzrovień — heta vysoki piešachodny most, jaki zastajecca suchim navat padčas samych mocnych pavodak.

Pavialičyć

Nižnija darožki śpiecyjalna raspracavanyja tak, kab časova sychodzić pad vadu, što dazvalaje naviedvalnikam biaśpiečna nazirać za dynamikaj pryrody. Dziakujučy hetamu prajekt staŭ nie tolki miescam adpačynku, ale i ŭzornym prykładam dla haradoŭ pa ŭsim śviecie, jak možna pieratvaryć klimatyčnuju pahrozu ŭ karysny resurs.

Pavialičyć

Suśvietny architekturny fiestyval (World Architecture Festival, WAF) ładzicca štohod, pačynajučy z 2008 hoda. Padać zajaŭku na ŭdzieł moža luby architektar ci architekturnaja majsternia niezaležna ad stupieni viadomaści. Fiestyval źjaŭlajecca samym bujnym štohadovym mierapryjemstvam u śfiery architektury ŭ śviecie. Štohod u im udzielničajuć bolš za tysiaču prajektaŭ z roznych krain. U hetym hodzie ŭ šort-list uvajšli 235 pabudovy, 157 prajektaŭ i 64 dyzajny interjeraŭ.

• 1
• 0
• 0
• 0
• 0
• 0
• 0
• 0