Banhładeš abahnała Biełaruś i stała najbujniejšym daŭžnikom Rasii z abjomam zapazyčanaści $7,84 młrd. Na trecim miescy — Indyja, u pieršuju piaciorku taksama ŭvajšli Jehipiet i Vjetnam, piša RBK.
Banhładeš stała najbujniejšym daŭžnikom Rasii, źmianiŭšy na pieršym miescy šmathadovaha lidara — Biełaruś. Zhodna z dadzienymi Suśvietnaha banka, jakija vyvučyŭ RBK, pa stanie na kaniec 2024 hoda paŭdniovaazijackaja dziaržava była vinnaja Rasii rekordnyja $7,84 młrd.
Za hod doŭh Banhładeš vyras na 19%, na kaniec 2023 hoda kraina była vinnaja Rasii $6,6 młrd. Biełaruś zaniała druhoje miesca, niahledziačy na toje što za hod doŭh źniziŭsia na 1,6%, z $7,75 młrd da $7,62 młrd. Na trecim miescy apynułasia Indyja, čyje abaviazańni za hod vyraśli na 19%, z $4,1 młrd da $4,9 młrd. U piaciorku tradycyjna ŭvajšli Jehipiet, čyj doŭh pierad Rasijaj pavialičyŭsia na 24%, z $3,3 młrd da $4,1 młrd, a taksama Vjetnam, čyj abjom zapazyčanaści za hod nie źmianiŭsia, zastaŭšysia na ŭzroŭni $1,4 młrd.
Minfin Rasii nie raskryvaje dadzienyja pa kankretnych krainach-daŭžnikach. Bank Rasii apošni raz publikavaŭ infarmacyju ab zapazyčanaści nierezidentaŭ pierad rasijskimi orhanami dziaržaŭnaha kiravańnia pa stanie na 1 studzienia 2022 hoda — jana aceńvałasia tady prykładna ŭ $49 młrd.
Źniešni doŭh Rasii pa stanie na 1 kastryčnika 2025 hoda skłaŭ $305 młrd.
Ciapier čytajuć
«Kali mnie prylacić, ja hatovaja». Nasta Rahatko — pra seks-scenu ŭ svajoj knizie, prarasijskich svajakoŭ, Hajun i Matolku47
Kamientary