Niehlubskija ručniki ŭniesienyja ŭ śpis niemateryjalnaj spadčyny JUNIESKA
U aŭtorak Mižuradavy kamitet pa achovie niemateryjalnaj kulturnaj spadčyny ŭklučyŭ elemient niemateryjalnaj kulturnaj spadčyny «Niehlubskaja tekstylnaja tradycyja Vietkaŭskaha rajona Homielskaj vobłaści» ŭ Śpis JUNIESKA, paviedamlaje MZS.
Rašeńnie było pryniataje padčas 20‑j siesii ŭ Ńju-Deli.
Niehlubskaja tekstylnaja tradycyja Vietkaŭskaha rajona — unikalnaja źjava biełaruskaj narodnaj kultury, jakaja zachavała archaičnyja rysy i składanyja simvały.
«Tradycyja sfarmavałasia ŭ XVII stahodździ i achoplivaje stvareńnie ručnikoŭ, pradmietaŭ adzieńnia i interjeru z vykarystańniem samabytnych technik tkactva i vyšyŭki.
Asablivuju viadomaść nabyli niehlubskija ručniki, jakija adroźnivajucca składanaj palichromnaj hamaj (da 25 adcieńniaŭ) i bahataj arnamientalnaj spadčynaj, što naličvaje bolš jak 120 uzoraŭ. Hieamietryčnyja i raślinnyja arnamienty («kryvuli», «pavuki», «jabłyńka») niasuć u sabie zašyfravanyja pažadańni dabra, kachańnia, dabrabytu i zdaroŭja. A ŭnikalnaść techniki, pry jakoj tkactva viadziecca z vyvaratu, zabiaśpiečvaje niepaŭtornaść kožnaha vyrabu», — havorycca ŭ paviedamleńni MZS.
Raniej niehlubskija ručniki ŭžo byli pryznanyja abjektam historyka-kulturnaj spadčyny Biełarusi.
Ciapier śpisy niemateryjalnaj kulturnaj spadčyny JUNIESKA naličvajuć siem biełaruskich elemientaŭ.
Raniej u ich byli ŭklučany: śviatočny kaladny abrad «Kaladnyja cary» ŭ vioscy Siemiežava (2009 hod), «Uračystaść u honar ušanavańnia Abraza Maci Božaj Budsłaŭskaj (Budsłaŭski fest)» u vioscy Budsłaŭ (2018 hod), «Jurjeŭski karahod» u vioscy Pahost Žytkavickaha rajona (2019 hod), kultura bortnictva (2020 hod), sałomaplacieńnie (2022 hod), «Vycinanka — tradycyjnaje mastactva vyrazańnia z papiery ŭ Biełarusi» (2024 hod).
Kamientary
Da sučasnych sprob zrabić "błakitny" abo "čyrvona-zialony" arnamient nie maje adnosin.