Donald Tramp zajaviŭ, što amierykanskija ŭłady zachapili «vielmi vialiki» naftavy tankier kala ŭźbiarežža Vieniesueły. Pavodle jaho słoŭ, dla zachopu tankiera byli «vialikija pryčyny», i paabiacaŭ dać padrabiaznaści paźniej, piša Bi-bi-si.
«Z punktu hledžańnia navin heta byŭ cikavy dzień. Jak vy, napeŭna, viedajecie, my tolki što zachapili tankier la ŭźbiarežža Vieniesueły, vialiki tankier, vielmi vialiki, najbujniejšy z kali-niebudź zachoplenych. Adbyvajucca i inšyja rečy, tak što vy ŭbačycie heta paźniej i pahavorycie pra heta paźniej ź inšymi ludźmi», — skazaŭ prezident ZŠA žurnalistam u Biełym domie.
«Jon byŭ zachopleny pa vielmi važkaj pryčynie», — skazaŭ jon žurnalistam krychu paźniej, nie ŭdajučysia ŭ padrabiaznaści. Tramp taksama paabiacaŭ, što ŭ bližejšy čas buduć apublikavany fatahrafii.
Nieŭzabavie paśla zajavy Trampa hienieralny prakuror ZŠA Pem Bondzi apublikavała ŭ sacsietkach dadatkovuju infarmacyju, zajaviŭšy, što tankier užo šmat hadoŭ znachodzicca pad sankcyjami z-za «ŭdziełu ŭ niezakonnaj sietcy pieravozki nafty, jakaja padtrymlivaje zamiežnyja terarystyčnyja arhanizacyi».
Jana paviedamiła, što FBR, Ministerstva ŭnutranaj biaśpieki i Bierahavaja achova ZŠA pry padtrymcy Ministerstva abarony «vykanali ordar na aryšt naftavaha tankiera, jaki vykarystoŭvaŭsia dla pieravozki sankcyjnaj nafty ź Vieniesueły i Irana».
Bondzi dadała, što zachop sudna la ŭźbiarežža Vieniesueły byŭ «praviedzieny biaśpiečna i paśpiachova», a rasśledavańnie «pieravozki sankcyjnaj nafty» praciahniecca.
Jana taksama apublikavała karotki videazapis samoj apieracyi.
Vieniesueła ŭ adkaz na zachop tankiera vypuściła zajavu, u jakoj asudziła Donalda Trampa, padkreśliŭšy, što «meta prezidenta ZŠA zaŭsiody zaklučałasia ŭ tym, kab zachapić vieniesuelskuju naftu bieź jakoj-niebudź kampiensacyi».
Taksama ŭ zajavie Karakasa skazana, što pryčyny praciahłaj ahresii ZŠA suprać Vieniesueły «narešcie raskryty»: «Heta nie mihracyja. Heta nie narkatrafik. Heta nie demakratyja. Heta nie pravy čałavieka. Havorka zaŭsiody išła ab našych pryrodnych resursach, našaj nafcie, našaj enierhii — resursach, jakija naležać vyklučna vieniesuelskamu narodu».
U apošnija tydni ZŠA ŭzmacnili vajennuju prysutnaść la ŭźbiarežža Vieniesueły, zajaviŭšy, što hetyja dziejańni nakiravany na baraćbu z narkatrafikam, adnak u Karakasie ličać, što Vašynhton imkniecca da źmieny režymu, kab atrymać kantrol nad vieniesuelskimi pryrodnymi resursami, u pieršuju čarhu naftaj.
U dačynieńni da vieniesuelskaj nafty ŭviedzieny sankcyi, choć dla niekatorych kampanij, naprykład, amierykanskaj Chevron, dziejničajuć vyklučeńni z sankcyjnaha režymu. Chevron ažyćciaŭlaje bureńnie ŭ mnohich častkach Vieniesueły i pracuje sumiesna ź dziaržaŭnaj naftavaj kampanijaj Petroleos de Venezuela (PDVSA).
U kancy listapada paviedamlałasia ab telefonnaj razmovie Donalda Trampa z prezidentam Vieniesueły Nikałasam Madura.
Ź vieraśnia ZŠA nanieśli ŭdary bolš čym pa 20 sudnach u Karybskim mory, jakija padazrajucca ŭ handli narkotykami, u vyniku čaho zahinuli pa mienšaj miery 87 čałaviek.
U paniadziełak Tramp zajaviŭ vydańniu Politico, što «dni Madura paličany», i nie vyklučyŭ mahčymaści naziemnaha ŭvarvańnia ZŠA ŭ Vieniesuełu.
Kamientary