U Šviejcaryi, pavodle paviedamleńniaŭ miascovaj presy, zatrymany ŭładalnik bara, u jakim u navahodniuju noč u vyniku pažaru zahinuli 40 čałaviek, piša Bi-bi-si.
Uładalnik bara, hramadzianin Francyi Žak Mareci, byŭ zatrymany, pakolki pravaachoŭnyja orhany paličyli, što jon moža ŭciačy.
Na hetym tydni stała viadoma, što na praciahu apošnich piaci hadoŭ u bary nie pravodzilisia supraćpažarnyja pravierki.
Šviejcarskaja prakuratura raspačała spravu suprać Mareci i jaho žonki Džesiki, saŭładalnicy bara.
Prakuratura kantona Vale pradjaviła im padazreńni ŭ niadbajnaści, jakaja pryviała da śmierci i kalectvaŭ.
«Prakuratura pryniała rašeńnie źviarnucca ŭ Sud prymusovych mier z prośbaj zaklučyć mieniedžara [bara] pad vartu», — zajaviła ŭ piatnicu prakuratura Vale, majučy na ŭvazie Žaka Mareci.
Nieŭzabavie paśla hetaj zajavy šviejcarskaja hazieta 24 Heures paviedamiła, što Žak Mareci sapraŭdy ŭžo ŭziaty pad vartu.
Jak pieradaje ahienctva Reuters, u piatnicu Žak i Džesika Mareci prybyli ŭ prakuraturu ŭ stalicy kantona Vale — horadzie Śjon. Na pytańni žurnalistaŭ jany adkazvać admovilisia.
U pažary ŭ bary Le Constellation na harnałyžnym kurorcie Kran-Mantana zahinuli 40 čałaviek, u tym liku šmat niepaŭnaletnich. Apioki i traŭmy atrymali 116 čałaviek.
Pavodle dadzienych śledstva, pažar pačaŭsia sa hukaizalacyjnaha pakryćcia stoli ŭ padvalnaj častcy bara, jakoje ŭspychnuła ad zanadta blizka padniesienych da jaho bienhalskich ahnioŭ, prymacavanych da butelek šampanskaha i padniatych uharu kampanijaj, što śviatkavała.
U piatnicu ŭ Šviejcaryi byŭ abvieščany dzień žałoby pa achviarach pažaru ŭ Kran-Mantanie. Ranicaj u krainie prajšła chvilina maŭčańnia. Zvanili zvany ŭsich cerkvaŭ, spynilisia ciahniki i tramvai, nienadoŭha była pierapyniena praca aeraportaŭ.
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki39
Kamientary