«Padvojnaje pasłańnie dla ZŠA». U Hrenłandyju pačali prybyvać jeŭrapiejskija vajskoŭcy. Pakul małakolkasnyja
U stalicu Hrenłandyi Nuuk prybyŭ francuzski vajskovy kantynhient kolkaściu 15 čałaviek. Jašče niekalki jeŭrapiejskich krain taksama nakiroŭvajuć tudy svaich sałdat u miežach tak zvanaj raźviedvalnaj apieracyi «Arktyčnaja stojkaść» — vučeńniaŭ, jakija ŭznačalvaje Danija, piša Bi-bi-si.
Napiaredadni pradstaŭniki Hrenłandyi i Danii sustrelisia ŭ Vašynhtonie z pradstaŭnikami ZŠA, adnak nie dasiahnuli zhody nakont budučyni samaha vialikaha vostrava ŭ śviecie. Prezident Tramp maje namier ustalavać amierykanski kantrol nad vyspaj lubym sposabam, nie vyklučajučy siłavoha.
Pra svoj udzieł u vučeńniach užo zajavili Francyja, Šviecyja, Hiermanija, Vialikabrytanija i Narviehija, paźniej da ich dałučylisia i Niderłandy. Prezident ZŠA Donald Tramp śćviardžaje, što vostraŭ, jaki maje vyhadnaje stratehičnaje raźmiaščeńnie i bahaty na minieralnyja resursy, žyćciova važny dla biaśpieki ZŠA, i Amieryka pavinna jaho kantralavać, kab jaho nie zaniali Rasija abo Kitaj.
Jon prapanuje kupić Hrenłandyju, ale nie vyklučaje i mahčymaści siłavoha zachopu. Hrenłandyja i Danija zajaŭlajuć, što vyspa nie pradajecca, a pahrozy siłaj — biezrazvažnyja. Lidary krain ES padtrymali Daniju. Adnak Tramp miarkuje, što Danija nie zdolnaja supraćstajać upłyvu Rasii i Kitaja ŭ Arktycy.
«Prablema ŭ tym, što Danija ničoha nie zmoža zrabić, kali Rasija abo Kitaj zachočuć akupavać Hrenłandyju, a my možam usio. Vy heta ŭbačyli na minułym tydni [u vypadku] ź Vieniesuełaj», — zajaviŭ Tramp u sieradu žurnalistam u Avalnym kabiniecie. Jon nie vyklučyŭ vykarystańnia siły, ale vykazaŭ nadzieju, što ŭdasca znajści niejkaje rašeńnie.
U sieradu adbyłasia sustreča vysokapastaŭlenych pradstaŭnikoŭ ZŠA, Danii i Hrenłandyi.
Ministr zamiežnych spraŭ Danii Łars Lokie Rasmusen zajaviŭ, što pieramovy byli kanstruktyŭnymi, ale pamiž dvuma bakami zachoŭvajucca «fundamientalnyja supiarečnaści».
Jak adznačaje Reuters, choć udałosia paźbiehnuć publičnaha prynižeńnia, padobnaha da taho, jakoje pieražyŭ prezident Ukrainy Uładzimir Zialenski letaś, sustreča nie pryniesła rašeńnia i ŭrehulavańnia sprečki.
«Amierykanskija ambicyi zachopu Hrenłandyi zastajucca ŭ sile», — zajaviła premjer-ministr Danii Miete Frederyksien u piśmovym kamientary Reuters u čaćvier, taksama adznačyŭšy «fundamientalnyja roznahałośsi».
«Heta, biezumoŭna, surjozna, tamu my praciahvajem prykładać namahańni, kab praduchilić realizacyju takoha scenaru [zachopu amierykancami]», — paabiacała jana.
ZŠA i Danija stvorać rabočuju hrupu dla abmierkavańnia šyrokaha koła pytańniaŭ, źviazanych z vyspaj, zajavili pradstaŭniki Danii i Hrenłandyi paśla pieramoŭ.
Jašče da sustrečy Hrenłandyja i Danija paviedamili, što pačali pavialičvać vajskovuju prysutnaść na vostravie i vakoł jaho ŭ ščylnym supracoŭnictvie z sajuźnikami z NATA.
«Uzbrojenyja siły Danii razam z šeraham arktyčnych i jeŭrapiejskich supolnikaŭ u najbližejšyja tydni vyvučać, jak na praktycy možna realizavać uzmocnienuju prysutnaść i praviadzieńnie vučeńniaŭ u Arktycy», — zajaviła Ministerstva abarony Danii.
Jeŭrapiejskaja vajskovaja prysutnaść u Hrenłandyi niasie padvojnoje pasłańnie dla administracyi ZŠA, ličyć analityk Mark Jakabsien z Karaleŭskaha abaronnaha kaledža Danii.
«Pa-pieršaje, strymlivaje: pakazać, što kali vy vyrašycie dziejničać vajskovym šlacham, my hatovyja abaraniać Hrenłandyju. Pa-druhoje, pakazać: my surjozna ŭsprymajem vašu krytyku, uzmacniajem našu prysutnaść, kłapocimsia pra naš suvierenitet i palapšajem nazirańnie za Hrenłandyjaj», — patłumačyŭ jon u kamientary Reuters.
Aliŭje Puaŭvr d'Arvor, pasoł Francyi pa spravach Arktyki i Antarktyki, u kamientary France Info zajaviŭ, što takim čynam płanujecca prademanstravać ZŠA, što NATA prysutničaje ŭ rehijonie, a ES unosić układ u zabieśpiačeńnie jaho biaśpieki.
Pradstaŭniki brytanskaha ŭrada padkreślili, što Vialikabrytanija padzialaje zakłapočanaść prezidenta Trampa pytańniami «biaśpieki ŭ vysokich šyrotach», a razhortvańnie sił praduhledžvaje «ŭzmacnieńnie i bolš intensiŭnyja vučeńni z metaj strymlivańnia rasijskaj ahresii i kitajskaj aktyŭnaści».
Ministr zamiežnych spraŭ Danii Rasmusen paśla pieramoŭ z pradstaŭnikami ZŠA zajaviŭ, što ŭ peŭnaj stupieni padzialaje zakłapočanaść ZŠA pytańniami biaśpieki, ale ŭ hety momant nie isnuje «niepasrednaj pahrozy» z boku Kitaja abo Rasii, ź jakoj Danija i Hrenłandyja nie zmahli b spravicca.
«Mety prezidenta [ZŠA] — u pracesie abmierkavańnia, — zajaviŭ jon u kamientary Fox News. — Viadoma, u nas jość svaje čyrvonyja linii. Zaraz 2026 hod: vy možacie handlavać ź ludźmi, ale vy nie možacie handlavać ludźmi».
Premjer-ministr Hrenłandyi Jens-Frederyk Nilsien u čaćvier znoŭ padkreśliŭ, što vyspa nie źbirajecca źmianiać jurysdykcyju.
«Hrenłandyja nie choča naležać Złučanym Štatam. Hrenłandyja nie choča kiravacca Złučanymi Štatami. Hrenłandyja nie choča być častkaj Złučanych Štataŭ», — padkreśliŭ jon.
Ministr zamiežnych spraŭ Danii Łars Lokie Rasmusen u sieradu paviedamiŭ, što ŭ Hrenłandyi zaraz znachodzicca kala 200 amierykanskich žaŭnieraŭ — značna mienš, čym u časy chałodnaj vajny. Nasielnictva vostrava składaje kala 57 000 čałaviek.
Ministr abarony Danii Troels Łund Poulsien zajaviŭ, što płanujecca zabiaśpiečyć bolš pastajannuju vajskovuju prysutnaść na ratacyjnaj asnovie z udziełam sajuźnikaŭ, jakija buduć prymać udzieł u vučeńniach i trenirovačnych zaniatkach. Maštab zapłanavanaha jeŭrapiejskaha vajskovaha naroščvańnia sił nie ahučany. Pakul havorka idzie ŭsiaho pra niekalki dziasiatkaŭ vajskoŭcaŭ, i niezrazumieła, jak doŭha jany zastanucca na miescy.
Hiermanija, jakaja nakiravała ŭ Nuuk transpartny samalot A400M z kantynhientam z 13 sałdat, zajaviła, što jany zastanucca ŭ Hrenłandyi tolki da suboty.
Francyja nakiroŭvaje ŭ Hrenłandyju kala 15 śpiecyjalistaŭ pa viadzieńni bajavych dziejańniaŭ u hornaj miascovaści, Šviecyja adpraŭlaje troch aficeraŭ, Narviehija — dvuch, Niderłandy — adnaho aficera fłotu. Vialikabrytanija taksama nakiroŭvaje adnaho aficera.
Premjer-ministr Polščy Donald Tusk zajaviŭ, što Polšča nie płanuje dałučacca da jeŭrapiejskaha vajskovaha razhortvańnia ŭ Hrenłandyi, ale papiaredziŭ, što luboje vajskovaje ŭmiašańnie ZŠA ŭ spravy vostrava «stanie palityčnaj katastrofaj».
«Kanflikt abo sproba anieksii terytoryi člena NATA inšym členam NATA buduć kancom śvietu, jakim my jaho viedajem, — śvietu, jaki doŭhija hady zabiaśpiečvaŭ našu biaśpieku», — skazaŭ jon na pres-kanfierencyi.
Tym časam pasolstva Rasii ŭ Bielhii vykazała «surjoznuju zakłapočanaść» padziejami ŭ Arktycy, abvinavaciŭšy NATA ŭ naroščvańni vajskovaj prysutnaści ŭ rehijonie «pad iłžyvym padstavaj rostu pahrozy z boku Maskvy i Piekina».
Ciapier čytajuć
Z prajekta budaŭnictva minskaha mietro vykinuli jašče dźvie stancyi — «Kijeŭski skvier» i «Politechničnuju»5
Z prajekta budaŭnictva minskaha mietro vykinuli jašče dźvie stancyi — «Kijeŭski skvier» i «Politechničnuju»
Aktor Toŭścikaŭ: Na pakazie, kali pryjšli zbolšaha rasijskija hledačy — publika śmiajałasia. A kali byli biełarusy, Cichanoŭskaja — stajała poŭnaja cišynia11
Kamientary