U SIZA KDB apynuŭsia Mikałaj Cyrto, fihurant staroj spravy Biełarusbanka. Druhi raz — za palityku
U kancy 2010‑ch jamu prysudzili za chabary 9 hadoŭ kałonii, ale chutka pamiłavali.
U kancy 2017 hoda hrupu top-mieniedžaraŭ Biełarusbanka asudzili za chabary. Pieršaha namieśnika staršyni praŭleńnia Hienadzia Haspadaryka i namieśnika dyrektara departamienta pa rabocie z kaštoŭnaściami Mikałaj Cyrto — razam, vykanaŭčaha dyrektara Anatola Bahavika — asobna, uśled za imi.
KDB aryštavaŭ Haspadaryka letam 2016‑ha, śledam — Cyrto. Paŭtara miesiaca Mikałaj Cyrto znachodziŭsia pad chatnim aryštam, paśla jaho ŭsio ž adpravili ŭ SIZA.
Cyrto, pa słovach svajho advakata, supracoŭničaŭ sa śledstvam, ale na sudzie atrymaŭ 9 hadoŭ kałonii ŭzmocnienaha režymu z kanfiskacyjaj majomaści: 5 tysiač akcyj «Biełarusbanka», kvatera ŭ Połacku, dom i ŭčastak u Viciebskaj vobłaści i inšaje.
Haspadaryku prysudzili 7,5 hoda kałonii.
Anatolu Bahaviku, jakoha asudzili praź miesiac paśla kaleh, dali 8 hadoŭ kałonii.
Adnak dalejšy los usich troch top-mieniedžaraŭ Biełarusbanka skłaŭsia niezvyčajna.
Bahavik vyjšaŭ pa pamiłavańni ŭžo ŭ mai 2018 hoda. U 2020‑m jon razam z žonkaj Ivannaj dałučyŭsia da ruchu za sumlennyja vybary.
U 2023‑m siłavili pryjšli pa ich. Ivanna atrymała dva hady kałonii. Anatolu dali mienš, dakładny termin nieviadomy. Jon jak recydyvist trapiŭ u kałoniju ŭ Vaŭkavysku i całkam adbyŭ pryznačanaje palityčnaje pakarańnie.
Hienadzia Haspadaryka taksama vyzvalili pa pamiłavańni. Infarmacyja pra heta źjaviłasia ŭ kancy 2019-ha, ale nieviadoma, kali mienavita bankir vyjšaŭ na svabodu. Haspadaryka ŭładkavali na vysokuju pasadu na MTZ, ale ŭ 2021 hodzie jon pamior ad nastupstvaŭ karanavirusa.
A voś pra dalejšuju bijahrafiju Cyrto raniej było nieviadoma.
Jak vyśvietliłasia, jon taksama atrymaŭ pamiłavańnie. Ale ŭ pačatku 2024 hoda Cyrto znoŭ trapiŭ u SIZA KDB, u «Amierykanku». Jon apynuŭsia tam u adnoj kamiery z surazmoŭcam «Našaj Nivy».
Za što Cyrto zabrali ŭ SIZA KDB druhi raz? U kamiery jon kazaŭ, što jaho aryštavali za pieradaču dadzienych u «Čornuju knihu Biełarusi».
«Maŭlaŭ, jon skinuŭ tudy danyja niekalkich fieldjehieraŭ, jakich viedaŭ jašče za časami svajoj raboty ŭ banku. Bolš jon sam nie raskazvaŭ, a ja nie raspytvaŭ. Zatrymali jaho niedzie ŭ 2023 hodzie», — skazaŭ naš surazmoŭca.
Sa słovaŭ Cyrto stali viadomyja abstaviny taho, jak jon, Haspadaryk i Bahavik apynulisia na svabodzie zadoŭha da kanca svaich terminaŭ.
«Maŭlaŭ, bankiraŭ vypuścili paśla taho, jak Siarhiej Rumas vyprasiŭ u Łukašenki pamiłavańnie dla ich», — skazaŭ naš surazmoŭca.
Pry hetym sam Cyrto padkreślivaŭ, što ŭ adroźnieńnie ad Haspadaryka ŭ kałoniju patrapić nie paśpieŭ, bo niejkim čynam zaciahnuŭ apielacyju.
Ci tak jano było nasamreč — nieviadoma. Apielacyja pa spravie prajšła ŭ kancy 2017-ha, prysudy nie źmianilisia. Haspadaryk dakładna trapiŭ u kałoniju — zapisy ab jaho pracy tam jość u Fondzie sacyjalnaj abarony nasielnictva, paćvierdzili ŭ Belpol.
A voś u Cyrto zapisaŭ ab adličeńni z kałonii sapraŭdy niama. Razychodžańni ŭ terminach pakul niemahčyma patłumačyć.
Čym Cyrto zajmaŭsia na voli da svajho zatrymańnia ŭ 2023‑m, nieviadoma. U bazach za hety čas pusta. «Pa jaho słovach, siadzieŭ doma i niańčyŭsia z unukami», — udakładniaje były sukamiernik.
Dalejšy los Mikałaja Cyrto taksama nieviadomy. U śpisie «ekstremistaŭ» abo «terarystaŭ» jaho proźvišča niama, što amal vyklučaje mahčymaść taho, što jaho ŭrešcie asudzili pa palityčnym artykule.
«Naša Niva» — bastyjon biełaruščyny
PADTRYMAĆ
Kamientary
jakaja ,,pryhožaja,, frezura (ci jak heta nazvać?) u razhladalščycy...