Ahraharadok Višnioŭka dakładna viadomy ŭsim, chto lubić adpačyvać na vadaschoviščy Viača. Hety nasieleny punkt raźmieščany za 11 kiłamietraŭ ad stalicy i pakul što tut žyvie mienš za tysiaču čałaviek. Adnak u najbližejšyja hady ŭsio moža źmianicca. U Višnioŭcy płanujecca pabudavać novyja žyłyja damy, škołu i hramadskija abjekty. Usiaho tut chočuć uźvieści amal 500 novych kvater. Napeŭna — z raźlikam na minčukoŭ, hatovych pierajechać u pryharad. Zaraz prajekt zabudovy vystaŭleny na hramadskaje abmierkavańnie, piša Realt.by.
Pravodzić hramadskaje abmierkavańnie hienieralnaha płana i PDP (płana detalovaj płaniroŭki) žyłoj zony Višnioŭki Minski rajvykankam. Da ŭdziełu zaprašajucca ŭsie zacikaŭlenyja asoby (asabliva — tyja, chto žyvie ŭ ahraharadku Višnioŭka i jaho vakolicach). Meta prajekta — stvaryć sučasny, kamfortny i pryvabny dla žyćcia nasieleny punkt.
Višnioŭka raźmieščana ŭ Papiarnianskim sielsaviecie Minskaha rajona, za 11 kiłamietraz ad stalicy. Pobač prachodziać MKAD-2 i aŭtamabilnaja daroha R-58, jakaja viadzie ŭ Miadzieł. Zaraz u ahraharadku žyvie kala 950 čałaviek. Nasieleny punkt składajecca z pryvatnych damoŭ i niekalkich dvuchpaviarchovych budynkaŭ. Ź infrastruktury tut jość pačatkovaja škoła, jaśli-sad, ambułatoryja, adździaleńnie suviazi, mahazin, prydarožna-hatelny kompleks, kaviarnia i AZS.
Dzie źjavicca novaje žyllo?
Hałoŭnyja źmieny zakranuć paŭdniova-ŭschodniuju častku ahraharadka. Na pieršym etapie (da 2030 hoda) šmatkvaternyja novabudoŭli mohuć vyraści ŭ rajonie skryžavańnia vulic Centralnaj i Prajektavanaj № 1. Na druhim etapie (da 2040 hoda) žyłyja damy pačnuć budavać uzdoŭž vulicy Prajektavanaj № 1, a taksama ŭ rajonie skryžavańnia Centralnaj i Maładziožnaj. Zaraz tut raźmieščanaja pačatkovaja škoła, jakuju płanujecca rekanstrujavać pad źmiašanuju hramadska-žyłuju zabudovu.
Novyja siadziby (mahčyma — taŭnchaŭsy) u ahraharadku taksama źjaviacca. Pryvatnyja damy mohuć raźmiaścić na vulicy Školnaj, uzdoŭž vulicy Pryaziornaj i na praciahu ŭčastka prajektavanaj vulicy Budaŭnikoŭ. Niekatoryja najaŭnyja kvartały siadzibnaj zabudovy čakaje ŭščylnieńnie. Jano moža zakranuć zavułak Lermantava, vulicy Palavuju i Čechava.
Pavodle płanaŭ horadabudaŭnikoŭ, usiaho ŭ Višnioŭcy budzie pabudavana bolš za 500 novych kvater i siadzib. Raźlik, chutčej za ŭsio, zrobleny na minčukoŭ. Ale kamu mienavita prapanujuć žyllo pobač z vadaschoviščam Viača — pakul nieviadoma.
Mahčyma, budaŭnictvam zojmucca staličnyja deviełapiery, hatovyja pry adsutnaści svabodnych placovak u Minsku ŭkłaścisia ŭ pryharad.Taksama nie vyklučany varyjant i z budaŭnictvam žylla dla tych, chto staić u čarzie. U takim vypadku damy buduć uzvodzić dziaržaŭnyja arhanizacyi.
Na pieršym etapie płanujecca pabudavać 165 kvater i damoŭ siadzibnaha typu, na druhim — jašče 248 kvater i siadzib. U cełym abjom novaha žyllovaha budaŭnictva składzie 33 tysiačy kvadratnych mietraŭ. Siudy ŭvojdzie jak šmatkvaternaja zabudova (72,9%), tak i siadzibnaja (27,1%).
A što budzie ź infrastrukturaj?
Na pieršym etapie ŭ Višnioŭcy płanujecca pabudavać novuju škołu na 502 miescy, handlovy abjekt płoščaj kala 600 kvadratnych mietraŭ i abjekt hramadskaha charčavańnia na 30 pasadačnych miescaŭ. Ustanova adukacyi źjavicca ŭ rajonie skryžavańnia vulic Centralnaj i Budaŭničaj.
Taksama horadabudaŭniki abiacajuć pradumać azielanieńnie — uparadkavać terytoryju kala vadaschovišča, abnavić najaŭnyja i stvaryć novyja parki, skviery i bulvary.
Što tyčycca kolkaści nasielnictva Višnioŭki, to jana budzie raści pastupova. Na pieršym etapie (da 2030 hoda) kolkaść žycharoŭ pavialičycca z 950 da 1350 čałaviek. Na druhim (da 2040 hoda) dasiahnie amal 2000 čałaviek.
Materyjały prajekta (schiemy i apisańnie) u dobraj jakaści vykładzienyja na sajcie Minskaha rajvykankama. Hramadskaje abmierkavańnie prajekta prachodzić z 26 studzienia pa 9 lutaha ŭ Papiarnianskim sielvykankamie (ahraharadok Balšavik, vuł. Fabryčnaja, 6). Tam ža 4 lutaha ŭ 18:00 adbudziecca prezientacyja i sustreča ź miascovymi žycharami.
Ciapier čytajuć
Histaryčnyja +40,4°C u Pinsku — heta tolki razahreŭ. Biełaruś uvachodzić u novuju klimatyčnuju eru i na vačach stanie lesastepam14
Kamientary