U Paryžy praviali pieratrus u miascovym ofisie X i vyklikali na hutarku Iłana Maska
U Paryžy prakuratura praviała pieratrus u francuzskim ofisie sacyjalnaj sietki X, jakaja naležyć Iłanu Masku, i vyklikała samoha Maska na «dobraachvotnuju hutarku». Francuzskija ŭłady rasśledujuć niekalki abvinavačvańniaŭ u adnosinach da płatformy X i jaje čat-bota Grok, piša Bi-bi-si.
Sačyć za rasśledavańniem dapamahajuć adździeł kibierzłačynstvaŭ žandarmieryi i Europol.
Sprava była raspačataja jašče ŭ studzieni 2025 hoda paśla skarhi francuzskaha palityka Eryka Batarela z praprezidenckaj partyi «Adradžeńnie», jaki śćviardžaŭ, što paśla kupli sacsietki Twitter Iłanam Maskam u 2022 hodzie ałharytmy sietki stali praduziatyja da peŭnych palityčnych pohladaŭ. Spačatku rasśledavańnie razhladała heta jak mahčymaje zamiežnaje ŭmiašańnie ŭ francuzskuju palityku.
U listapadzie da spravy dadalisia abvinavačvańni ŭ dačynieńni da čat-bota Grok, jaki, pavodle prakuratury, raspaŭsiudžvaŭ publikacyi z sumnieŭnymi śćviardžeńniami pra vykarystańnie nacystami hazu ŭ łahierach śmierci. U studzieni Francyja razam ź Jeŭrakamisijaj i Vialikabrytanijaj pačali jašče adno rasśledavańnie suprać Grok za stvareńnie «raździetych» fotazdymkaŭ realnych ludziej.
Brytanski rehulatar Ofcom taksama rasśleduje X Grok praz «seksualizavanyja» vobrazy, stvoranyja botam. U adnoj z zajaŭ X adznačyła, što zabaraniła Grok hienieravać padobny kantent tam, dzie jon niezakonny. Adnak paciarpiełyja ličać, što kampanija Maska xAI, jakaja raspracavała Grok, i X uvohule nie pavinny byli nadavać botu takuju funkcyju.
U Vialikabrytanii ŭ vypadku pryznańnia vinavataści X pahražaje štraf da 10% ad suśvietnaha abaračeńnia abo 18 miljonaŭ funtaŭ, u ES — da 6% ad suśvietnaj vyručki. Padobnyja rasśledavańni pravodziacca taksama ŭ Aŭstralii i Hiermanii. U Indaniezii i Małajzii Grok časova zabaranili, adnak paźniej abmiežavańnie źniali.
Ciapier čytajuć
Ad pryvatnikaŭ patrabujuć zavieści ideołaha ŭ štacie — raspytali, što robiać kampanii17
Kamientary