Vosiem anłajn-servisaŭ dla vyvučeńnia biełaruskaj movy na prasunutym uzroŭni
Kali «dziakuj» i «kali łaska» — užo nie vyklik, čas znajści roźnicu pamiž «šufladkaj» i «švorkaj». Budzma.org sabrała biaspłatnyja prahramy, testy i videa dla tych, chto viedaje azy biełaruskaj movy i choča iści dalej.
1. Mova: belarusian language
Mabilnaja prahrama dla tych, chto choča pašyryć słoŭnikavy zapas. Tut bolš za 3000 słoŭ, raźbityja pa temach ad miedycyny da mastactva. Jość admysłovyja leksičnyja padborki ad biełaruskich muzykaŭ. Dajecca tłumačeńnie leksičnaha značeńnia słovaŭ i prykłady skazaŭ, u jakich jany ŭžytyja. U naładach možna vybrać adnu z troch movaŭ interfiejsu i vučyć biełaruskuju navat praz anhielskuju.
Asablivaści prahramy:
- Naciski ŭ słovach nie paznačanyja.
- Słovy majuć ahučku.
- Pierakład słoŭ jość.
- Leksičnaje značeńnie słoŭ jość.
- Prykłady skazaŭ sa słovam jość.
- Karcinki dla ilustracyi słova jość.
- Mova interfiejsu: biełaruskaja, anhielskaja, rasiejskaja.
Mova: belarusian laguage dla Android.
Mova: belarusian lanuage dla iOS.
2. Mova 2.0
Hetaja mabilnaja prahrama daje mahčymaść vučyć leksiku, raźbirać hramatyku, vykonvać testy i čytać cikavostki pra biełaruskuju kulturu.
Stvaralniki abiacajuć navučyć słovam štodzionnaha ŭžytku «ad šufladki da łajanki». Błok «Hramatyka» z karotkimi praviłami nahadvaje školny padručnik. Viedy možna pravieryć u błoku «Testy», ale pa niekatorych temach jany niedasiažnyja, bo jašče raspracoŭvajucca.
U błoku «Cikavinki» sabranyja karotkija teksty na roznyja temy: ad prymavak da paradaŭ pa stasunkach z ŽESam. Tut ža jość hulnia «Znajdzi słova»: u kvadracie siarod litar treba adšukać schavanyja słovy.
Asablivaści prahramy:
- Naciski ŭ słovach paznačanyja.
- Słovy nie majuć ahučki.
- Pierakład na rasiejskuju jość tolki dla niekatorych słoŭ.
- Leksičnaha značeńnia słoŭ niama.
- Prykłady skazaŭ sa słovam jość.
- Malunki dla ilustracyi słova jość.
- Mova interfiejsu: biełaruskaja.
3. Sloucy
Mabilnaja hulnia, u jakoj sabranyja 277 słoŭ z adpaviednymi malunkami. Padajecca, mała, ale słovy vybranyja takija, jakija niepadobnyja da rasiejskich — ad šydełka da švorki.
Łohika hulni: z šaści fotazdymkaŭ treba vybrać toj, što adpaviadaje napisanamu słovu. Da kožnaha słova prahrama maje niekalki varyjantaŭ malunkaŭ. Tamu ŭ kožnym raŭndzie davodzicca pilna šukać patrebny i dakładna razumieć značeńnie słova.
Asablivaści prahramy:
- Naciski ŭ słovach paznačanyja.
- Słovy nie majuć ahučki.
- Pierakładu słoŭ niama.
- Leksičnaha značeńnia słoŭ niama.
- Prykładaŭ skazaŭ sa słovam niama.
- Malunki dla ilustracyi słova jość.
- Mova interfiejsu: biełaruskaja.
4. Ŭordli
Hulnia ŭ słovy, jakaja pracuje praz braŭzier. Staronku možna dadać na hałoŭny ekran telefona, i jana budzie vyhladać jak zvyčajnaja prahrama. Hulnia isnuje bolš čym na 50 movach i štodnia źbiraje da 10 miljonaŭ hulcoŭ va ŭsim śviecie. Biełaruskamoŭnuju viersiju za dva dni zrabiŭ prahramist Dźmitryj.
Zadača hulcoŭ — adhadać słova ź piaci litar za šeść sprob. Paśla kožnaj sproby prahrama padśviečvaje litary, jakich u słovie niama, jakija stajać nie na svaim, a jakija na svaim miescy.
Zhulać možna tolki raz na dzień. Novaje słova źjaŭlajecca paśla apoŭnačy. Kali adhadać nie atrymałasia, prahrama pakaža pravilny adkaz i daść spasyłku na staronku ŭ słoŭniku z hetym słovam.
5. Moŭnyja testy
Testy na sajcie «Radyjo Svaboda» pracujuć u braŭziery i nie majuć mabilnaj prahramy. Jany znajomiać z admietnymi biełaruskimi słovami, jakija adroźnivajucca ad rasiejskich. Naprykład, u biełaruskaj movie «skałka» zusim nie datyčyć pracy ź ciestam.
Rubryka abnaŭlajecca redka, ale na staroncy ŭžo jość bolš za 80 testaŭ. Pieršy test paličyć kolkaść biełaruskich słoŭ, jakija vy viedajecie.
6. Homan
Videakurs biełaruskaj movy na Youtube ad prajekta «Hodna». Viadučyja — muzyka Andruś Takindanh i movaznaŭca Alaksiej Šein. Kožny vypusk pryśviečany adnoj štodzionnaj temie ad vitańniaŭ da nadvorja. Viadoŭcy tłumačać słovy pa-biełarusku, ale časam pierakładajuć na rasiejskuju.
Farmat videa:
- Kolkaść videa: 8.
- Praciahłaść adnaho videa: kala 40 chvilin.
7. #Movazdoma
Karotkija videa na Youtube ad prajekta «Art Siadziba». Viadoŭca Saša Babkova tłumačyć słovy, u jakich biełarusy časta pamylajucca: sabie ci siabie, tabie ci ciabie, pa vulicam ci pa vulicach i inšyja.
Farmat videa:
- Kolkaść videa: 11.
- Praciahłaść adnaho videa: kala 2 chvilin.
8. Tolki pra movu
Karotkija videa i kartki ŭ Instagram i Tiktok ad movaznaŭcy Vincuka Viačorki i jaho kamandy. Jany tłumačać značeńni biełaruskich słoŭ i roźnicu pamiž biełaruskaj i rasiejskaj leksikaj.
Prajekt pačynaŭsia na Facebook, dzie supołka dahetul pracuje jak forum: kožny moža zadać moŭnaje pytańnie, na jakoje adkažuć Vincuk Viačorka i inšyja ŭdzielniki. Pierad zapytam varta zrabić pošuk u supołcy. Vierahodna, adkaz užo isnuje.
Hety prajekt vyłučajecca tym, što jaho kantent kantraluje movaznaŭca, tamu jon zasłuhoŭvaje bolšaha davieru. Adnačasova raim padpisvacca na inšyja biełaruskamoŭnyja staronki, jakija vam daspadoby, kab atačać siabie biełaruskaj movaj štodnia. I adnojčy ranicaj vy adhadajecie słova va «Ŭordli» ź pieršaj sproby i zrazumiejecie, što darohi nazad užo niama.
Daškievič raskazaŭ, jak vychoŭvaje dziaciej biełaruskamoŭnymi
Historyja biełaruskamoŭnaha minskaha samielje, jaki viedaje 8 moŭ i viarnuŭsia z Ženievy, kab padymać kulturu ŭ Biełarusi
Dyrektarka turfirmy nie paznała biełaruskuju movu, kali vinšavała z Dniom jadnańnia Biełarusi i Rasii. I praciahvaje siabie zakopvać
Tam, dzie stahodździe tamu hučała biełaruskaja mova, siońnia panuje polskaja. Što zastałosia ad biełaruskich havorak u Litvie
Ministr adukacyi zajaviŭ pra žadańnie pašyrać i papularyzavać ruskuju movu
Chto tyja dva piersanažy, jakija nie pili ŭ mižvajennaj Vilni, jak Zośku Vieras abudzili ad letarhii i ci praŭdzivaja bajka pra Karatkieviča i restaran11
Kamientary