U Baranavickim rajonie pierad staradaŭniaj carkvoj śpiłavali drevy. Žychary aburanyja
U vioscy Volna Baranavickaha rajona śpiłavali staryja drevy pierad baročnaj carkvoj. Pra heta paviedamili miascovyja žychary ŭ Threads, jakija nie razumiejuć, navošta heta zrabili, zaŭvažyła vydańnie BGmedia.
Pavodle słoŭ vidavočcaŭ, havorka idzie pra terytoryju, jakaja ličycca pačatkam byłoha parku rodu Śliźniaŭ. Raniej heta miesca vyhladała jak zialonaja zona kala chrama, ale ciapier častka drevaŭ užo zrezanaja.
Na fota vidać śpiłavanyja stvały i terytoryju pobač z carkvoj, jakaja znachodzicca na restaŭracyi. Aficyjnych tłumačeńniaŭ pryčyn praviadzieńnia takich rabot pakul niama.
Biełarusy ŭ Threads nie strymalisia ŭ emocyjach, kali kamientavali situacyju. Dla mnohich heta vyhladaje jak čarhovaja strata zvykłaha łandšaftu.
«Jak usiudy… Takoje adčuvańnie, što niejkaje varjactva navokał».
«Kapiec. Tam tak pryhoža było ŭletku».
«Vyzvalajuć miesca ŭrahanam».
Situacyja z vysiakańniem drevaŭ u Volnie — nie vyklučeńnie, a častka bolš šyrokaj prablemy, jakaja nazirajecca ŭ roznych rehijonach Biełarusi.
U Minsku padobnyja vypadki nie raz vyklikali kanflikty pamiž žycharami i kamunalnymi słužbami. Ludzi aburalisia zrazańniem drevaŭ jak u dvarach, tak i ŭ zialonych zonach, naprykład u lesaparkach Miadźviežyna i Kałodziščy.
U apošnim vypadku žychary navat arhanizavali pietycyju, kab spynić źniščeńnie zialonaj terytoryi, dzie płanujecca budaŭnictva žyłoha kompleksu.
U Homieli taksama nieadnarazova ŭźnikali sprečki. Žychary krytykavali vyrubku drevaŭ u centry horada, u tym liku na vulicy Baŭmana i ŭ skviery, dzie paśla pastavili pomnik maršału Rakasoŭskamu. Na ich dumku, paśla takich rabot haradskaja prastora hublaje ŭtulnaść i stanovicca mienš pryvabnaj.
U Breście situacyja atrymała asablivy rezanans. Abureńnie vyklikała vydaleńnie drevaŭ kala Bresckaj krepaści — miesca ź vialikim histaryčnym značeńniem. Akramia taho, žychary źviartali ŭvahu, što pierad vizitami vysokich čynoŭnikaŭ u horadzie aktyŭna pravodzicca «ŭparadkavańnie», jakoje časta supravadžajecca vysiakańniem dreŭ.
U cełym u roznych haradach paŭtarajecca padobnaja situacyja: ułady tłumačać vysiakańni dreŭ nieabchodnaściu ramontu, budaŭnictva abo ŭparadkavańnia, ale žychary časta nie atrymlivajuć dastatkova jasnych tłumačeńniaŭ i nie razumiejuć, čamu mienavita takija miery ličacca patrebnymi. Heta i stanovicca pryčynaj niezadavolenaści i kanfliktaŭ.
U Miadźviedžynie tatalna vysiakajuć les. Aficyjnaja viersija — ratujuć ad karajeda
«Adbiarycie ŭ hetych nieadekvatnych piłu!» Jak deputaty «naviali paradak» na histaryčnych mohiłkach u Breście
U Viazyncy śpiłavali malaŭničyja drevy, nachilenyja nad vadoj FOTY
Homielskija ŭłady dziela ŭstanoŭki pomnika Rakasoŭskamu vysiekli ceły skvier u centry horada
U adnym z mahiloŭskich skvieraŭ pavysiakali viekavyja duby
«Bulba» z Oršy pajšoŭ vajavać za Rasiju — ciapier siastra šukaje jaho ci chacia b jaho pareštki9
Kamientary