«Pahadziŭsia dziela dački». Eks-futbalist zbornaj Biełarusi biare ŭdzieł u rasijskim šou «Tytany»
Cimafiej Kałačoŭ raspavioŭ pra pačatak svajoj televizijnaj karjery.
Razam z dačkoj Janaj jon uziaŭ udzieł u prajekcie «Tytany» na rasijskim telekanale TNT, paviedamlaje «Biełaruski futboł».
— Ja, kali ščyra, byŭ krychu ŭ ździŭleńni i spačatku prosta adžartavaŭsia: «Jakija jašče «Tytany»? I ja tam navošta?» Ja daŭno zaviaršyŭ prafiesijnuju karjeru i ŭvohule nie razhladaŭ dla siabie ŭdzieł u padobnych prajektach.
Pavodle słoŭ Kałačova, dačka Jana padklučyła da ŭhavorvańnia baćki rodnych i siabroŭ.
U vyniku jon pahadziŭsia na ŭdzieł u prajekcie pierš za ŭsio dziela dački: «Napeŭna, hałoŭnym dla mianie byŭ nie sam udzieł, a mahčymaść padtrymać Janu i prajści hety vopyt razam ź joj. Ja jašče da prajekta pastajanna žartavaŭ, što prymu ŭdzieł maksimum u adnoj sieryi, a Jana pojdzie dalej. Dla mianie heta byŭ całkam novy dośvied, ale samaje hałoŭnaje — my ź Janaj zmahli prajści jaho razam. Dumaju, mienavita heta i zastaniecca dla mianie samym kaštoŭnym uspaminam pra hety prajekt».
Taksama Kałačoŭ adznačyŭ, što paśla zaviaršeńnia karjery nie płanavaŭ viartacca da spartyŭnaj kankurencyi ŭ padobnym farmacie: «Ja ŭžo daŭno zakončyŭ prafiesijny sport, mnie 45 hadoŭ, a na prajekcie — maładyja, vielmi mocnyja spartsmieny, jakija znachodziacca ŭ vydatnaj fizičnaj formie. Tamu ja ŭvohule nie razumieŭ, jakoje dačynieńnie maju da takoha šou».
Šou «Tytany» startavała ŭletku 2024 hoda na rasijskim telekanale TNT. Zaraz idzie piaty siezon.
Hety prajekt — ekśpierymient, u jakim štučny intelekt raspracoŭvaje dla ŭdzielnikaŭ składanyja vyprabavańni, što praviarajuć fizičnuju siłu, ciahavitaść i spryt. Pieramožca atrymlivaje zvańnie «Tytana» i hrašovy pryz 10 miljonaŭ rasijskich rubloŭ (zaraz kala 120 tysiač dalaraŭ). Šou źjaŭlajecca adaptacyjaj paŭdniovakarejskaha Physical: 100.
U «Tytanach» brali ŭdzieł znakamityja rasijskija spartsmieny, jak chakieist Illa Kavalčuk, futbalist Fiodar Kudrašoŭ, baksior Alaksandr Pavietkin, himnast Alaksandr Niemaŭ.
Cimafiej Kałačoŭ zakončyŭ karjeru futbalista ŭ 2019 hodzie. Hulaŭ za mahiloŭski «Dniapro», salihorski «Šachcior», rasijskija «Kryły Savietaŭ», «Chimki», «Rastoŭ». Za zbornuju Biełarusi zhulaŭ 76 matčaŭ.
Kamientary