Pad rasijskim Vybarham zahinuŭ mužčyna, jaki ŭdzielničaŭ u lasnym fiestyvali. Kažuć, što jon ź Biełarusi

Solar Systo Togathering, abo prosta «Sista», — adzin z najbujniejšych lasnych fiestyvalaŭ Rasii. Jon spałučaje muzyčnyja sceny roznych napramkaŭ, kirmašy, vystavy i namiotavy łahier. Taksama jaho nazyvajuć «Źlotam plamion».

Fiestyval uźnik u pačatku 2000‑ch u vioscy Sista-Pałkina pad horadam Sasnovy Bor, a ŭ apošnija hady pravodzicca na druhim bierazie Finskaha zaliva, pad horadam Prymorskam. Mierapryjemstva adbyvajecca dvojčy na hod — u mai i vieraśni — i źbiraje niekalki tysiač čałaviek. Namiotavy łahier raściahvajecca prykładna na čatyry kiłamietry.

Pa słovach hramadzianskaj žonki Anatola Dziny, jany šmat hadoŭ pryjazdžali na «Sista» jak turysty, a taksama pradavali adzieńnie ŭłasnaha vyrabu, u asnoŭnym šaravary. U noč pierad pačatkam fiestyvalu jany z Anatolem zastalisia ŭ namiotavym łahiery ŭdvaich.

Dzina raskazała, što pozna ŭviečary da ich namiotaŭ pryjšli troje mužčyn. Jana śćviardžaje, što jany mahli być pjanymi abo znachodzicca pad uździejańniem niejkich rečyvaŭ. Mužčyny šukali inšych ludziej ź ich łahiera, a kali vyśvietliłasia, što tam zastalisia tolki Anatol i Dzina, pačali vyśviatlać, što jany robiać u hetym miescy. Anatol vyjšaŭ z namiota, paśla čaho, pavodle słoŭ Dziny, troje mužčyn pačali jaho źbivać. Kali vyjšła žančyna, udary pačali nanosić i joj.

Žančyna paviedamiła, što joj vybili zub, a taksama zastalisia ŭdary, siniaki i drapiny. Jana nie bačyła pačatku bojki i tamu nie moža skazać, što adbyvałasia da jaje vychadu. Taksama jana nie bačyła momantu, kali Anatol moh vykarystać siakieru. Adzin z udzielnikaŭ kanfliktu pakazvaŭ ranu na śpinie, ale Dzina śćviardžaje, što heta była vialikaja drapina, jakaja nie vyhladała jak śled ad udaru siakieraj.

Paśla źbićcia Anatol lažaŭ na miescy zdareńnia. Dzina pabiehła pa dapamohu ŭ susiednija łahiery i paprasiła vyklikać chutkuju. Pavodle jaje słoŭ, mužčyny niekalki razoŭ adychodzili i viartalisia. Inšy ŭdzielnik fiestyvalu, Anton, pasprabavaŭ umiašacca i supakoić kanflikt.

Chutkaja dapamoha pryjechała, ale praz drenny stan daroh u lesie miedyki čakali na trasie. Dzina śćviardžaje, što Anatola nie chacieli adrazu vieźci da miedykaŭ. U niejki momant jon užo nie moh razmaŭlać i skazaŭ: «Ja nie mahu dychać». Mužčynu pahruzili ŭ aŭtamabil i pavieźli da kantrolna-prapusknoha punkta, dzie čakała chutkaja dapamoha. Pa słovach Dziny, pa darozie jany zrazumieli, što jon pamior, i pakinuli cieła na ŭzbočynie kala pavarotu na fiestyval, paśla čaho paviedamili miedykam, što znajšli mužčynu tam. Kali Dzina prybiehła da miesca, supracoŭniki chutkaj užo ahladali Anatola, a ŭdzielniki kanfliktu źjechali nazad u les.

Anatol šmat hadoŭ pracavaŭ pramysłovym alpinistam. Jaho znajomyja pa hetaj prafiesii charaktaryzujuć jaho jak dobraha čałavieka i sumniavajucca ŭ viersii pra toje, što jon biehaŭ za ludźmi ź siakieraj. Pavodle adnaho z alpinistaŭ, Anatol zvyčajna nasiŭ z saboj nož i ź siakierami asabliva nie siabravaŭ. U jaho zastalisia darosłyja dzieci ad papiarednich šlubaŭ.

Palicyja pryjechała nočču i apytała Dzinu. Paźniej siłaviki ahledzieli łahier i apytali čałavieka, jaki vyklikaŭ chutkuju dapamohu. Spačatku byli zatrymanyja dvoje mužčyn, jašče adzin paźniej źjaviŭsia razam sa svaim advakatam. Pavodle Dziny, zatrymanyja nie pryznavali, što bili jaje. Paśla pachavańnia jana taksama płanuje źviarnucca ŭ palicyju nakont rečaŭ, jakija, pavodle jaje słoŭ, źnikli z łahiera.

Paśla nieabchodnych biurakratyčnych pracedur brat zahinułaha Aleh pavioz jaho cieła na radzimu, u Biełaruś. Pachavańnie pavinna było adbycca 10 vieraśnia. Rodnyja paprasili žurnalistaŭ na hety čas ustrymacca ad kamientaroŭ, ale zajavili, što buduć damahacca spraviadlivaści i pakarańnia vinavatych.

Arhanizatar fiestyvalu Siarhiej vykazaŭ spačuvańni siamji Anatola i adznačyŭ, što kamanda «Sista» adčuvaje svaju datyčnaść da trahiedyi, choć i nie ličyć, što mahła niepasredna praduchilić zdareńnie. Pavodle jaho, troje mužčyn, jakija akazalisia ŭdzielnikami kanfliktu, mieli roznaje dačynieńnie da fiestyvalu. Adzin ź ich raniej niekalki hadoŭ pracavaŭ administrataram, ale arhanizatary ŭžo nie płanavali ź im supracoŭničać praź ciažkuju chvarobu. Druhi byŭ supracoŭnikam inšaj słužby, jakaja zajmałasia arendaj namiotaŭ. Treci mužčyna pieryjadyčna ŭdzielničaŭ u roznych mierapryjemstvach jak vałancior.

Paviedamlajecca, što pa spravie ab śmierci Anatola aryštavanyja troje mužčyn, proźviščy jakich — Abramaŭ, Mazanik i Jaromin. Sud adpraviŭ ich pad vartu na dva miesiacy. Im vystaŭlena abvinavačańnie ŭ naŭmysnym pryčynieńni ciažkaj škody zdaroŭju, jakaja pa nieaściarožnaści pryviała da śmierci.

U sacyjalnych sietkach u fihurantaŭ spravy zastalisia roznyja ślady. Najbolš aktyŭna siabie tam pakazvaŭ Abramaŭ: jon źviazvaŭ siabie z arhanizatarami «Sista», pisaŭ pra psichałahičnuju adukacyju, publikavaŭ vieršy i videa ź fiestyvalaŭ, a taksama demanstravaŭ epatažny vobraz ź vialikaj kolkaściu tatuirovak, u tym liku svastykaj i kałaŭrotam. Mazanik z Sankt-Pieciarburha cikaviŭsia ezaterykaj, runami i praktykami ŭśviadomlenaści, a ŭ sacyjalnych sietkach pisaŭ pra dabryniu, sumlennaść i «ŭdaskanaleńnie śvietu». Jaromin vioŭ svaje staronki bolš strymana: publikavaŭ zmročnyja cytaty, fatahrafii ź fiestyvalaŭ i histaryčnych rekanstrukcyj, a taksama materyjały, źviazanyja z «Sista», fentezi i elektronnaj muzykaj.

• 0
• 0
• 0
• 4
• 2
• 2
• 2
• 0