«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna
Ciapier Stasi Stralčeni 24 hady, u jaje jość muž i syn. Biełaruska vyrašyła znajści baćku, jakoha navat nie pamiataje — bo vieryła, što jaho niama ŭ jaje žyćci pieradusim praz zabaronu maci.
Svaju dramatyčnuju historyju Stasia apublikavała ŭ Threads. Naradziłasia jana ŭ rasijskim Novamičurynsku, heta 250 km ad Maskvy. Kaža, što jaje baćka — Juryj Jerchaŭ — prychodziŭ pahladzieć na novanarodžanuju dačku, ale byccam by inšyja svajaki Stasi byli suprać taho, kab toj niejak kamunikavaŭ ź dziciom.
«Kali mnie było dva hady, mama i babula pavieźli mianie ŭ Biełaruś. A ŭ čatyry hady my pryjechali ŭ Rasiju da majoj prababuli. I jon taksama pryjšoŭ. Ale jamu dazvolili tolki pahladzieć na mianie, pakul ja spała. Jon papłakaŭ i pajšoŭ».
Usio heta dziaŭčyna daviedałasia z raspoviedaŭ blizkich.
Ciapier joj 24 hady. Stasia sama ŭžo paśpieła stać žonkaj i maci. Ale ž dumki pra toje, što chočacca paznajomicca z tatam, nie adpuskali.
U vyniku biełaruska vyrašyła pravieryć moc Threads i napisała ŭsio, što viedała pra baćku — i dadała jaho školnaje fota. Dopis Stasi pahladzieli bolš za 200 tysiač razoŭ, jon sabraŭ niekalki socień kamientaroŭ.
U chutkim časie joj raspaviali, što ŭ mužčyny naradziłasia jašče dvoje synoŭ. Stasi dasłali niekalki kantaktaŭ jaho imaviernych svajakoŭ — adzin ź ich akazaŭsia pamyłkovym.
Znajści realnaha tatu ŭdałosia za dva dni. Stasia napisała jamu, ale mužčyna admoviŭsia razmaŭlać z dačkoj i paprasiŭ bolš nie turbavać jaho i jaho siamju.
Biełaruska pryznałasia, što joj baluča, ale jana pavažaje rašeńnie baćki.
U kamientarach mierkavańni padzialilisia. Niechta vinavacić u situacyi mamu Stasi — maŭlaŭ, a raptam by mužčyna byŭ dobrym tatam. Niechta, naadvarot, ličyć, što nijakija zabarony nie zmahli b spynić čałavieka, jaki choča być sapraŭdnym baćkam. Jość i tyja, chto miarkuje, što ŭvohule nie varta było šukać mužčynu, bo jon svoj vybar daŭno zrabiŭ.
Chtości pasprabavaŭ suciešyć. Maŭlaŭ, a raptam u baćki prosta šok i jon praź niekatory čas sam vyjdzie na suviaź. Ale Stasia adkazała, što mužčyna byŭ davoli kateharyčnym u svajoj admovie.
Biełaruska ŭdziačna kožnamu, chto dałučyŭsia do pošukaŭ: «Ja ŭvohule nie čakała, što stolki nieznajomych ludziej tak uklučacca ŭ maju historyju — buduć šukać, pisać mnie, padtrymlivać. Da hetaha času krychu ŭ šoku ad taho, što ŭsio heta ŭvohule adbyłosia. Ja pryjšła siudy ŭ nadziei znajści adnaho čałavieka. A ŭ vyniku znajšła stolki ludziej, dziakujučy jakim uvieś hety čas adčuvała siabie nie takoj samotnaj».
Ciapier čytajuć
U Minsku masažyst Andrej tajemna zdymaŭ hołych klijentak29
Kamientary