Sud adchiliŭ hučny pazoŭ Iłana Maska suprać kampanii OpenAI i jaje kiraŭnika Sema Altmana
Kalehija prysiažnych u Kalifornii adnahałosna spyniła razhlad spravy, pakolki Mask padaŭ pazoŭ paśla zakančeńnia terminu daŭnaści dla takich pazovaŭ, paviedamlaje Bi-bi-si.
Mask abvinavačvaŭ Altmana ŭ parušeńni niekamiercyjnaha pahadnieńnia z-za taho, što toj pieratvaryŭ OpenAI ŭ kamiercyjnuju kampaniju paśla taho, jak Mask achviaravaŭ 38 miljonaŭ dalaraŭ.
Pavodle Maska, Altman padmanuŭ jaho: pryniaŭ achviaravańnie, a paśla admoviŭsia ad pieršapačatkovaj niekamiercyjnaj misii OpenAI — raspracoŭvać technałohii štučnaha intelektu na karyść čałaviectva.
U OpenAI śćviardžali, što pieraŭtvareńnie ŭ kamiercyjnuju strukturu było nieabchodnaje, kab kampanija mahła zarablać srodki dla dalejšaha raźvićcia štučnaha intelektu.
Prysiažnyja na praciahu troch tydniaŭ vyvučali ŭnutranuju pierapisku i słuchali śviedčańni. Vierdykt byŭ vyniesieny prykładna paśla dźviuch hadzin abmierkavańnia.
Śviedkami pa spravie vystupili sami Mask i Altman, a taksama hienieralny dyrektar Microsoft Saćja Nadeła, jakoha Mask abvinavačvaŭ u saŭdziele ŭ hetaj schiemie.
U pieršy dzień suda Mask vystupiŭ u ciomnym kaściumie i halštuku. Adzin ź jaho advakataŭ spytaŭ, u čym sutnaść pazovu.
«Nasamreč usio vielmi prosta, — skazaŭ Mask. — Nielha skraści dabračynnuju arhanizacyju… Kali dapuścić kradziež dabračynnaj arhanizacyi, to ŭsia asnova dabračynnaści budzie razburana».
Adnak Altman u svaich pakazańniach zajaviŭ, što Mask nie tolki padtrymlivaŭ ideju pieraŭtvareńnia OpenAI ŭ kamiercyjnuju kampaniju, ale i chacieŭ kantralavać jaje ŭ doŭhaterminovaj pierśpiektyvie.
«Asabliva tryvožnym byŭ momant, kali maje suzasnavalniki spytali [Maska]: «Kali kantrol budzie ŭ vas, što adbudziecca paśla vašaj śmierci?» Jon adkazaŭ niešta kštałtu: «Mahčyma, kantrol pavinien pierajści maim dzieciam», — raspavioŭ Altman.
Inšyja pazovy Maska, u tym liku suprać Microsoft, taksama byli adchilenyja ŭ adpaviednaści z zakonam paśla rašeńnia prysiažnych pa dvuch pazovach suprać OpenAI.
OpenAI była zasnavanaja Maskam i Altmanam u 2015 hodzie jak niekamiercyjnaja arhanizacyja. U lutym 2018 hoda adnosiny pamiž suzasnavalnikami pahoršylisia, i Iłan Mask pakinuŭ saviet dyrektaraŭ OpenAI.
Pradstaŭnik OpenAI Sem Sinier, adkazvajučy na pytańni žurnalistaŭ kala budynka suda, nazvaŭ vierdykt «vielizarnaj pieramohaj».
«Heta była ŭsiaho tolki sproba spadara Maska zapavolić kankurenta», — zajaviŭ jon, dadaŭšy, što heta pieramoha «i dla sistemy pravasudździa».
Minčuk źniaŭ rolik pra čarhu ŭ paliklinicy, dzie było bolš za 150 čałaviek. Za heta na jaho napisali zajavu ŭ milicyju10
Kamientary