Apublikavali fota abłomkaŭ drona, jakija ŭpaŭ u Rumynii — heta dakładna «Hierań-2»
Prezident Rumynii Nikušor Dan paviedamiŭ, što dron, jaki ŭpaŭ na žyły dom u rumynskim horadzie Hałac, byŭ rasijski, i apublikavaŭ fota jaho abłomkaŭ.
«Na znojdzienych frahmientach byŭ identyfikavany nadpis kirylicaj «Hierań-2», a praanalizavanyja elektronnyja kampanienty, navihacyjnyja sistemy, błoki kiravańnia, ruchavik i kanstruktyŭnyja elemienty demanstrujuć padobnaść, až da identyčnaści, ź inšymi bieśpiłotnikami «Hierań-2», znojdzienymi raniej na terytoryi Rumynii i z upeŭnienaściu identyfikavanymi jak vyrablenyja ŭ Rasijskaj Fiederacyi.
U spravazdačy taksama adznačajecca, što zavadskaja markiroŭka, techničnyja nadpisy, kanstruktyŭnyja charaktarystyki i vykarystanyja materyjały adpaviadajuć tamu ž technałahičnamu pracesu, jaki sustrakaŭsia ŭ bieśpiłotnikach «Hierań-2», praanalizavanych za apošnija hady», — napisaŭ Nikušor Dan u X.
«Toj fakt, što padobnaja pryłada trapiła ŭ žyły dom u Rumynii, pryčyniŭšy traŭmy i materyjalny ŭron, maje asablivuju surjoznaść, i adzinym adkaznym bokam źjaŭlajecca Rasija», — dadaŭ jon.
Uładzimir Pucin raniej zajaŭlaŭ, što niama dastatkovych dokazaŭ datyčnaści Rasii da incydentu. Jon taksama dapuściŭ, što dron moh być ukrainskim, i prapanavaŭ pieradać jaho frahmienty dla rasśledavańnia ŭ Rasiju.
Bieśpiłotniki «Hierań» Rasija pačała prymianiać dla ataki Ukrainy z vosieni 2022 hoda.
Kamientary