Ajcišnika z redkim proźviščam Kašepava sudzili pa palityčnaj spravie
Vypusknika Biełaruskaj dziaržaŭnaj akademii suviazi adpravili na chimiju z nakiravańniem.
Siarhieju Kašepavu 41 hod. Jon sa Śmiłavič, apošnim časam žyŭ u Minsku. U 2006 hodzie Siarhiej skončyŭ «vyšku» ŭ Biełaruskaj dziaržaŭnaj akademii suviazi (raniej — Vyšejšy kaledž suviazi).
Jašče sa škoły jon byŭ radyjoamataram. A ŭ 2017 hodzie pačaŭ samastojna vyvučać prahramavańnie, pačynajučy z technałohij Arduino i Web. U 2020 hodzie mužčyna paśpiachova skončyŭ kursy pa Android-raspracoŭcy ad RSschool.
Paśla navučańnia Kašepava pačaŭ karjeru ŭ IT. Z 2021 pa 2025 hady Siarhiej pracavaŭ Android-raspracoŭščykam u kampanijach Transistor Apps i Createx. Jon stvaraŭ mabilnyja dadatki, pracavaŭ sa štučnym intelektam, hieałakacyjaj i 3D-madelami.
U volny čas Siarhiej zajmajecca budaŭnictvam na ŭłasnym učastku, a taksama šmat padarožničaŭ pa biełaruskich aziorach. Taksama jon zachaplaŭsia maržavańniem i kupaŭsia kruhły hod.
Niadaŭna Siarhieja asudzili ŭ Minskim abłasnym sudzie. Jaho abvinavacili pavodle častak 1 i 2 artykuła 361‑4 Kryminalnaha kodeksa Biełarusi, sadziejničańnie ekstremisckaj dziejnaści.
Siarhieju prysudzili abmiežavańnie voli ŭ papraŭčaj ustanovie adkrytaha typu (chimija z nakiravańniem). Termin nam nieviadomy.
«Ekstremizmam» ułady Biełarusi ličać padpiski na niezaležnyja kanały, ŚMI, najaŭnaść spasyłak na ich u sacyjalnych sietkach ci najaŭnaść u sacsietkach abo na rečach biełaruskaj nacyjanalnaj, dałukašenkaŭskaj simvoliki. Da «ekstremizmu» zaličvajuć taksama praktyčna ŭsialakuju krytyku ŭładaŭ, aficyjnych histaryčnych naratyvaŭ ci prajavy salidarnaści z Ukrainaj.
Šmatlikija kryminalnyja spravy apošniaha času pa artykule ab «sadziejničańni ekstremizmu» byli źviazanyja sa «spravaj Hajuna».
«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.
«Sprava Hajuna» pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.
Zasnavalnik «Hajuna» Anton Matolka adrazu paśla ŭzłomu patłumačyŭ, jak adbyłasia ŭciečka infarmacyi, i abviaściŭ pra zakryćcio prajekta.
Pavodle padlikaŭ abjadnańnia siłavikoŭ «Biełpoł» i pravaabaroncaŭ, viadomyja imiony 9594 ludziej, jakija padpali pad palityčna matyvavanyja kryminalnyja spravy. Usiaho tyja ci inšyja palityčnyja represii (kryminałki, administratyŭki, zvalnieńni, pieratrusy) začapili kala 500 tysiač biełarusaŭ. Niekalki socień tysiač ludziej vymušanyja byli pakinuć krainu.
Kamientary