“Załatuju halinu” Kanaŭ atrymała rumynskaja drama pra aborty
Małabiudžetnaja stužka nieviadomaha režysera abyšła karciny Vonha Kar Vaja, Koenaŭ, Tarantyna i Hasa Van Senta. Pryzami ŭznaharodzili “4 miesiacy, 3 tydni i 2 dni”, “Les Mohary”, “Vyhnańnie”, “Skafandr i matyl”, ”Ź inšaha boku”.
27 traŭnia 2007 hodu zavieršyŭsia jubilejny, 60-y Kanski fest. Małabiudžetnaja stužka rumynskaha režysera abyšła karciny Vonha Kar Vaja, Koenaŭ, Tarantyna i Hasa Van Senta.
“Załatuju halinu” Kanskaha festu i pryz FIPRESI atrymaŭ film Krystyjana Mundžu “4 miesiacy, 3 tydni i 2 dni”. Stužka raspaviadaje pra padpolnyja aborty ŭ kamunistyčnaj Rumynii nakonadni skonu režymu Čaŭšesku.
Da Kanskaha festu režyser byŭ nikomu nie viadomy. Atrymlivajučy ŭznaharodu, Mundžu pryznaŭsia, što šče hod tamu nia moh źniać karcinu, bo hrošy adsutničali. Režyser spadziajecca, što jahony prykład natchnić mnohich niezaležnych tvorcaŭ.
Hran-pry zasłužyŭ japonski režyser Naomi Kavase za dramu “Les Mohary” pra zabłukałuju nianiu z domu starych.
Pryz za “Najlepšuju žanočuju rolu” taksama adyšoŭ Azii. Paŭdniovakarejskaja aktrysa Čon Do-Jen była adznačanaja ŭ kamedyjnaj meladramie “Patajemnaje śviatło sonca”.
A voś “Najlepšaja mužčynskaja rola” dastałasia rasiejcu Kanstancinu Łaŭranienku za film Andreja Źviahincava “Vyhnańnie”. Łaŭranienka syhraŭ i ŭ papiaredniaj karcinie Źviahincava “Viartańnie”. (Akramia taho, jon hraŭ u apošniaje stužcy biełaruskaha režysera Valeryja Rubinčyka “Nankinski pejzaž”.)
“Najlepšym režyseram” pryznany Džulijan Šnabel za bijahrafičnuju dramu “Skafandr i matyl” pra paralityka-redaktara.
Pryz za “Najlepšy scenar” i pryz Ekumeničnaha žury atrymaŭ Facich Akin za sacyjalnuju dramu “Ź inšaha boku (Na ŭskrajku raju)”. (Jahonaja papiaredniaja stužka “Hałavoj ab ścienu” išła ŭ mienskim prakacie.)
A pryz žury padzialili pamiž saboj animacyjnaja drama “Persepolis” Marjana Satrapi j film Karłasa Rejhadasa “Cichaje śviatło” pra zdradu j vyprabavańnie viery.
Hasu Van Sentu dastaŭłsia suciašalny pryz “60-aj hadaviny festu” za “Paranoid park” pra skiejtbardysta-zabojcu. A izrailski piśmieńnik Edhar Kieret (jahonuju knihu “Kiroŭca aŭtobusa, jaki chacieŭ stać Boham” niadaŭna pierakładli na biełaruskuju movu) atrymaŭ “Załatuju kameru” za najlepšy debiut (film “Meduza”, razam z Šyraj Hiefen).
Braty Koeny, jakich nazyvali favarytami – nie atrymali aničoha.
Pa-za konkursam Majkł Mur vykryvaŭ amerykanskuju systemu achovy zdaroŭja (“Sajka”), Pucina abvinavačvali ŭ zabojstvie, a Andžej Vajda demanstravaŭ pracoŭnyja materyjały stužki “Katyń” (premjera pryznačanaja na vierasień).
Biełaruś na Kanskim feście pakul nie pradstaŭlena, chacia małabiudžetny rumynski film dakazvaje, što heta mahčyma.
Fota z sajtu Film.ru
Ciapier čytajuć
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1818
Kamientary