U Kanach adkryŭsia jubilejny, 60-y kinafest
U konkursie pradstaŭlenyja karciny Vonha Kar Vaja, Emira Kusturycy, Kvencina Taranciny, Hasa Van Senta, Dejvida Finčera, Katryn Brei, bratoŭ Koenaŭ.
16 traŭnia ŭ Kanach adkryŭsia jubilejny mižnarodny kinafest. Sioleta sama značny suśvietny kinaforum śviatkuje svajo 60-hodździe.
Sam Kanski fest musiŭ źjavicca na śviet 1 vieraśnia 1939 hodu, ale dzień narodzinaŭ pryjšłosia adkłaści na paślavajenny čas.
Za 60 hadoŭ hledačoŭ i haściej festu ckavali tyhrami (1957 hod, pradusar Majkł Tod reklamavaŭ svaju stužku); vyvozili na karetach chutkaj dapamohi (2002, paśla filmu Haspara Nae “Niezvarotnaść”); aktrysu Hrejs Kieli svatali za kniazia Manaka (1955, paśpiachova), a režysera Žana-Luka Hadara zakidvali tartami (1985). Režyser Majkł Mur dałučaŭsia da aktorskaha strajku (2004), a druhija “prahresiŭnyja kinematahrafisty” zryvali fest u 1968-ym.
Ale hałoŭnymi ŭ Kanach zastajucca filmy; sam fest maje vyznačalny ŭpłyŭ na kinapraces.
U jubilejnaj prahramie pradstaŭleny 22 stužki.
Fest adkryŭsia konkursnaj stužkaj Vonha Kar Vaja “Suničnyja nočy” z aktoram Džudam Łoŭ i džazavaj śpiavačkaj Noraj Džonz.
Emir Kusturyca pryvioz karcinu “Abiacaj mnie heta”, Kim Ki Duk - “Uzdych”, Has Van Sent – “Paranoid Park”, Dejvid Finčer pradstaviŭ “Zadyjak”, braty Koeny – “Dla starych tut miesca niama”, a turecki režyser Facich Akin – stužku “Ź inšaha boku”.
Skandalnaja pornafeminiska Katryn Breja fihuruje ŭ konkursie sa “Staroj paluboŭnicaj”, rasiejec Alaksandar Sakuraŭ – z “Alaksandraj”, a jahony suajčyńnik Andrej Źviahincaŭ – z “Vyhnańniem”.
Kvencin Tarancina padrychtavaŭ dla festu “Dokaz śmierci” – druhuju častku “Hryndchaŭsa”, stvoranaha im razam z Radryhiezam.
Pa-za konkursam Majkł Mur pakaža praŭdalubskuju stužku “Sajka”. A jahony halivudzki kaleha Styven Soderberh ładzić premjeru “13 siabram Oŭšena” (na premjery čakajucca Džordž Kłuni, Met Dajman, Al Pačyna i Bred Pit).
Sielota Kany buduć ušanoŭvać Marcina Skarseze, u jakoha jość prava dać majstar-klasu dla abranaje publiki.
A admysłovym siurpryzam staniecca źniataja da jubileju zbornaja stužka 35 režyseraŭ: Raman Palanski, Vim Venderz, Andrej Kančałoŭski, Vonh Kar Vaj dyj inšyja zrabili pa 3 chviliny “pryznańnia lubovi da kino”.
Kinafest praciahniecca da 27 traŭnia.
Ciapier čytajuć
Aryštavany viadomy nieŭrołah Rusłan Badamšyn. Jon byŭ na chatniaj chimii2
Kamientary