Апублікавана новае відэа рэкорднага скачка Фелікса Баўмгартнера са стратасферы, здзейсненага ў кастрычніку 2012 года.
Баўмгартнер выскачыў з адмысловай капсулы, паднятай з дапамогай паветранага шара з геліем ў стратасферу на вышыню 39045 метраў. Свабоднае падзенне спартсмена-экстрэмала, які атрымаў мянушку Бясстрашны Фелікс, доўжылася 4 хвіліны 19 секунд. Пасля гэтага раскрыўся парашут, і смяльчак удала прызямліўся ў амерыканскім штаце Нью-Мексіка.
Ролік пад назвай «Full Story» змантаваны з архіўных кадраў скачка папярэдняга рэкардсмена Джозэфа Кіцінгера, а таксама з кадраў, знятых камерамі на скафандры Баўмгартнера. Паказаны сам скачок з адмысловай капсулы, паднятай на вышыню амаль 39 тысяч метраў, палёт і прызямленне. Відаць, што ў пачатку скачка Баўмгартнера закруціла, аднак яму ўдалося стабілізаваць сваё становішча ў паветры.
Баўмгартнер адначасова устанавіў тры сусветныя рэкорды: здзейсніў скачок з самай вялікай вышыні, дамогся самай вялікай дыстанцыі вольнага падзення і развіў самую высокую ў гісторыі хуткасць вольнага падзення — 1357,6 км/ч. Ён стаў адзіным чалавекам у свеце, які пераадолеў хуткасць гуку самастойна.
Праз некалькі дзён пасля скачку Баўмгартнер абвясціў пра завяршэнне спартыўнай кар'еры. «Больш не засталося нічога, чаго б я не дамогся. Гэта быў самы буйны праект у маім жыцці. І я шчаслівы, што пасля ўсіх сваіх дасягненняў застаўся жывы».
Каментары