Нацыянальны каларыт стане лейтматывам конкурсу «Міс Беларусь — 2016». Пра гэта паведаміла журналістам дырэктар дырэкцыі спецпраектаў тэлеканала АНТ, які арганізуе конкурс, Анжаліна Мікульская. Тэма беларускай мовы, культуры, гісторыі, нацыянальных касцюмаў пройдзе праз увесь конкурс. Нацыянальны акцэнт будзе прысутнічаць у фотасесіях, падчас дэфіле будуць дэманстравацца адпаведныя мадэлі адзення.
Строгі адбор журы, які праходзіў у лютым гэтага года, амаль з тысячы прыгажунь змаглі вытрымаць 50. Але толькі 26 з іх пасля працяглага этапу гутарак з журы ўдалося выйсці на фінішную прамую. Сярод прэтэндэнтак на тытул «Міс Беларусь — 2016»: студэнткі і дзяўчаты, якія ўжо працуюць, лінгвісты і мадэлі, будучыя архітэктар і інжынер-металург.
Вынік стараннасці беларускіх прыгажунь стане вядомы ўжо 19 чэрвеня, калі ў Палацы спорту адбудзецца фінальнае шоу.
Нацыянальны конкурс «Міс Беларусь» праводзіцца раз на два гады.
Сімвалам конкурсу і ўзнагародай з'яўляецца залатая карона. Упрыгожванне вагой 120 грам выканана з белага золата і ўсыпана фіянітамі і тапазамі.
Арганізатарам конкурсу і кастынгаў выступае тэлеканал ОНТ.
Каментары