Добраахвотнік Радзівон Батулін у сваім канале пацвердзіў гібель 23‑гадовага беларускага добраахвотніка Ціхана Клюкача. «Парэшткі «Франца» ўдалося выцягнуць», — напісаў ён.
Лёс Ціхана Клюкача апошнімі днямі быў няясны, паведамлялася і пра тое, што ён загінуў, і пра тое, што ён знік без вестак.
Але беларускі добраахвотнік Радзівон Батулін пацвердзіў дрэнную навіну.
«Парэшткі «Франца» ўдалося выцягнуць. Следам за ўсімі неабходнымі працэдурамі адбудзецца развітанне», — напісаў ён.
Калі і пры якіх абставінах загінуў Клюкач, невядома.
Ціхан Клюкач — былы палітвязень. Ён нарадзіўся і вырас у Берасці. Палітвязнем стаў у 18 гадоў, спрабуючы ўратаваць ад зняволення дзяўчыну, у якую закахаўся.
Тады сяброўка Ціхана, 18‑гадовая Сафія Малашэвіч, размалявала балончыкам з фарбай сістэму «Рубеж» — шчыты спецыяльных сродкаў абгароджвання. Ціхан на судзе спрабаваў узяць адказнасць за гэта на сябе, хоць на відэа было відаць, што малявала менавіта дзяўчына. Аднак у выніку калонію атрымалі і ён, і яна.
На волю хлопец выйшаў 7 сакавіка 2022 года і праз нейкі час выехаў з Беларусі.
Тады Расія акурат была напаўшы на Украіну, і Клюкач, зусім малады, палічыў сваім абавязкам пайсці на фронт добраахвотнікам. Падчас службы быў звязаны і з Палком Каліноўскага, і з палком «Пагоня», які ў 2022 годзе спрабаваў ствараць ва Украіне Вадзім Пракоп'еў.
Праз праблемы ў адносінах з саслужыўцамі і камандзірамі Ціхан сыходзіў з войска, а пасля вяртаўся.
Цяпер чытаюць
22‑гадовы Віктар з-пад Клецка пратрымаўся на фронце месяц. А пасля бацькі перасварыліся, дзелячы грабавыя14
Каментары