Праектную дэкларацыю на будаўніцтва адклікалі. На кватэры ў планаваным масіве «адсутнічае попыт», а праект «немагчыма рэалізаваць», піша «Новы час» на падставе паведамленняў дзяржаўнай прэсы.
З 2020 года за «Экспабелам» у раёне трасы на Лагойск узводзіцца жылы комплекс ад МАПІДа. Цэны на кватэры ў малапавярховым комплексе з закрытымі дварамі забудоўшчык назваў толькі летам мінулага года. Многім тады яны падаліся высокімі.
З таго часу пра комплекс каля вядомага савецкімі расстрэламі ўрочышча Курапаты нічога не было чуваць, а цяпер у газеце «Звязда» з’явілася аб’ява, якая тычыцца праекта.
У апублікаваным паведамленні гаворыцца, што
ААТ «МАПІД» адклікае праектную дэкларацыю аб праекце будаўніцтва аб’екта «Жылы мікрараён у раёне пасёлка Сонечны Мінскага раёна» (паводле Генплана) за 27 жніўня 2022 года з прычыны адсутнасці попыту на гэты аб’ект і немагчымасцю яе рэалізацыі.
«Сонечны» — жылы праект «Мапіда». Комплекс будуюць на ўчастку каля 22 га ў аднайменным пасёлку за «Экспабелам». Па праекце тут павінен з’явіцца цэлы раён, які складаецца са шматкватэрных дамоў, таўнхаусаў і катэджаў. Усё жыллё ў квартале павінна было быць панэльным — са зборнага жалезабетону.
Прэзентуючы праект, у «Мапідзе» заявілі, што дамы мусілі быць пасаджаныя на стылабат і збірацца, як канструктар, на шрубавых злучэннях без зваркі.
Першай у 2020 годзе стартавала будоўля сяміпавярховікаў. Праз пытанні з электразабеспячэннем (новы квартал павінен быць цалкам электрычным) работы на некаторы час прыпыняліся, аднак затым будаўніцтва аднавілі.
У першым доме праекта, які складаецца з сямі паверхаў і 78 кватэр, забудоўшчык прапанаваў 39 кватэр. Кошт «квадрата» ў адмененай ужо дэкларацыі складаў 3980 рублёў (каля 1560 даляраў). У цану ўваходзіў таксама паркінг.
Таксама ў праект уваходзіла будаўніцтва пачатковай школы і дзіцячага сада.
Завяршыць першы жылы дом павінны былі ў сакавіку сёлета. Увесь комплекс планавалі здаць у эксплуатацыю цягам 5-6 гадоў. Але цяпер, як выглядае, праект паклалі ў шуфляду.
Пакуль невядома, ці можа гэта быць неяк звязана з арыштам генеральнага дырэктара «Мапіда» Мікалая Мілашэўскага, інфармацыя пра які з'явілася сёння.
Чытайце таксама:
Затрыманы гендырэктар «Мапіда». Імаверна, па справе былога намесніка старшыні Мінгарвыканкама
Цяпер чытаюць
Каб не сядзець у Расіі за наркотыкі, малады даносчык з Ашмянаў запісаўся на фронт. Дый згінуў9
Каментары