Cirque du Soleil пракаментаваў наём падпісанта пралукашэнкаўскага ліста
Знакаміты канадскі цырк адказаў на запыт «Нашай Нівы» з просьбай пракаментаваць працу з беларускім батутыстам Уладзіславам Ганчаровым. Як стала вядома ў канцы мінулага тыдня, Ганчароў сышоў з нацыянальнай зборнай і прыняў прапанову працаваць у Cirque du Soleil.
У сваім адказе прэс-служба цырка падкрэслівае шматкультурны і шматнацыянальны характар трупы.
«Cirque du Soleil Entertainment Group — гэта сусветная забаўляльная кампанія, якая штодня ладзіць выступы перад разнастайнай аўдыторыяй ва ўсім свеце і ў якой працуе міжнародны склад артыстаў з больш чым 80 краін. Як творчая кампанія, мы шчыра верым у адкрытасць, разнастайнасць, інклюзіўнасць і павагу. Гэтыя каштоўнасці кіруюць нашым узаемадзеяннем з артыстамі, супрацоўнікамі, партнёрамі і прыхільнікамі, і адлюстроўваюцца ва ўсіх нашых пастаноўках.
Мы таксама верым, што культура знаходзіцца па-за палітыкай і што мастацтва не мае геаграфічных межаў. Такім чынам, мы не засноўваем наш працэс выбару артыстаў на палітычных, рэлігійных або любых іншых поглядах нашых кандыдатаў, а толькі на іх майстэрстве, таленце і гісторыі выканання».
У Cirque du Soleil ужо некалькі гадоў працуе іншы беларус, былы спартовы гімнаст Сямён Букін, які за ўдзел у пратэстах адседзеў суткі і быў вымушаны пакінуць краіну.
Ліст у падтрымку Аляксандра Лукашэнкі з'явіўся ў адказ на масавыя пратэсты супраць фальсіфікацыі выбараў 2020 года. Гэты ліст выкарыстоўваўся для апраўдання масавых рэпрэсій супраць іншадумцаў, якія суправаджаліся катаваннямі ў тым ліку арыштаваных спартоўцаў. За непадпісанне ліста не пагражалі рэпрэсіі, але непадпісанты гублялі працу і кантракты ў Беларусі.
Ганчароў перабраўся ў ЗША недзе месяц таму, і цяпер працуе ў шоу Michael Jackson, ён знаходзіцца ў Лас-Вегасе.
Пры гэтым афіцыйная ідэалогія, якую адстойвалі падпісанты ліста, малюе краіны Захаду, і найперш ЗША, як маральна дэградаваныя і поўныя эканамічных праблем.
Уладзіслаў Ганчароў не прынёс прабачэння за падпісанне таго ліста і ніяк не каментаваў свой пераезд.
«Наша Нiва» — бастыён беларушчыны
ПАДТРЫМАЦЬГэтыя спартоўцы знайшлі сябе на дзяржТБ
Беларускага трэнера прызналі найлепшым у чэмпіянаце Кіпра
«Цырку ўсё роўна, хто ў ім працуе» — удзельнік Cirque du Soleil аб прыездзе Улада Ганчарова
Цяпер чытаюць
«Яна даўнавата ў Беларусі». Бацька Анжалікі Мельнікавай прызнаўся, што яна жывая і здаровая90
Каментары