«Ганарыўся, што ў свае гады атрымае кватэру»: амапавец, які забіў ваенкама ў Асіповічах, атрымаў 10 гадоў калоніі і ўжываецца з палітычнымі
Як стала вядома «Нашай Ніве», забойца Сяргея Плескага, ваенкама Рэчыцкага і Лоеўскага раёнаў, атрымаў 10 гадоў і адбывае іх у «Віцьбе». Як з палітычнымі сядзіць былы амапавец, расказаў той, хто перасякаўся з ім у калоніі.
38-гадовы Сяргей Плескі, вайсковы камісар Рэчыцкага і Лоеўскага раёнаў, загінуў у выніку бойкі ў асіповіцкім рэстаране «Пралеска» летам 2021-га.
Плескі адпачываў у рэстаране, дзе ў яго ўзнік канфлікт з 25-гадовым супрацоўнікам органаў унутраных спраў.
Міліцыянт нанёс апаненту ўдар, які прывёў да смерці на месцы здарэння. Пазней высветлілася, што гэта быў супрацоўнік АМАП.
Сварка, маўляў, здарылася праз дзяўчат.
Чытайце таксама: Пасля бойкі з міліцыянерам памёр вайсковы камісар Рэчыцы. Што вядома на гэты момант?
Як стала вядома цяпер, затрыманы тады амапавец атрымаў 10 гадоў калоніі па арт. 147 ч. 3 КК РБ. Свой тэрмін ён адбывае ў «Віцьбе» — у Віцебскай калоніі.
Вось што пра яго расказалі тыя, хто з ім перасякаўся.
«Малады зусім хлопец, няма дакладна 30. Служыў у мінскім АМАПе, а сам родам з Асіповіч, дзе і адбыўся інцыдэнт.
Гэта невысокі чалавек, каранасты. Але пасля СІЗА ён быў вельмі асцярожны, ні з кім не канфліктаваў, я так зразумеў, што ў СІЗА з яго збілі ўвесь гонар гэты амапаўскі, што «мне ўсё дазволена». Спусцілі на зямлю. Пра палітычныя падзеі казаў, маўляў, у 2020-м не працаваў у АМАП, а служыў у нейкім спецназе не ў сталіцы і ўдзелу ў разгонах не прымаў. Але асцярожна ўсё ж калег спрабаваў апраўдваць, але глыбока ў палітычныя размовы не лез. На работы выходзіць з палітычнымі, працуе, нармальна», — расказаў нам суразмоўца.
«Асаблівых інтарэсаў па жыцці ў яго не было, як я зразумеў. Ён толькі вось вельмі ганарыўся, што ў свае гады ён «зарабіў сабе на кватэру». Калі з ім здарылася тое, што здарылася, ён акурат афармляў ільготную кватэру, свежую, у Мінску. Ужо дакументы былі ўсе падпісаныя, вырашана ўсё, чакаў толькі пераезду. Ну і мы смяяліся з яго», — дадаў наш суразмоўца.
«Наша Нiва» — бастыён беларушчыны
ПАДТРЫМАЦЬ
Каментары
11 гадоў Калеснікавай за адмову выезду з сваёй краіны.
Але амоныш малайчына ўсё ж, адным ударам двух зайцоў забіў: лукашысцкага ваенкама задвухсоціў і здаровых людзей ад сябе на 10 гадоў абараніў.