Адкуль узялася мода на боўлы і як самому скласці боўл

Поке боўл — гэта сытная страва гавайскай кухні з элементамі японскай. У арыгінальным варыянце яе аснову складаюць вараны рыс, сырая, запечаная або марынаваная рыба, соус і нейкая свежая гародніна ў якасці дадатку. Боўл у перакладзе з англійскай мовы азначае «глыбокая талерка, міска», таму, у адпаведнасці з назвай, страва падаецца ў місцы.

«Поке» ў перакладзе з гавайскай азначае «нарэзаць на кавалачкі». Так называецца нарэзаная кубікамі сырая рыба, якую на Гаваях падаюць альбо ў якасці закускі, альбо як асноўную страву.

У еўрапейскай культуры боўлавы «бум» здарыўся адносна нядаўна, гадоў пяць таму ў асноўным дзякуючы інстаграмным фуд-блогерам, для якіх галоўнае, каб у кадры ежа выглядала прывабнай і была пажыўнай. Таму прыгожа раскладзеныя ў місцы прадукты пачалі называць боўламі.

Але, вядома, проста пакласці розныя кампаненты ў міску — яшчэ не значыць зрабіць «правільны» боўл. Лепш, каб прысутнічалі ўсе названыя інгрэдыенты:

• нейкія цэльназбожжавыя крупы, што адказваюць за павольныя вугляводы;
• бабовыя, яйкі, нятлустае мяса, птушка, рыба або морапрадукты як бялковы складнік;
• арэхі, авакада, семачкі, алівы і масліны, аліўкавы алей — крыніца тлустых кіслот амега-3;
• гародніна, садавіна і зеляніна — вітаміны і клятчатка.

Вось тры ідэі для боўлаў, якія могуць стаць карыснымі абедзеннымі ссабойкамі.

Боўл з курыцай і жоўтым рысам

• 50 г рысу басмаці
• 100 г курынай грудкі
• 30 г сыру камамбер
• 5 г аліўкавага алею
• 1 агурок
• 1/2 морквы
• 5 г кунжуту
• спецыі

У каструлі са злёгку падсоленай вадой адварыце рыс паводле інструкцыі. Падчас варкі дадайце чайную лыжку куркумы і ўсё старанна змяшайце — такая апрацоўка ператворыць рыс з маркотнага дадатку да абеду ў сонечны жоўты. Курыцу вымыйце, нарэжце кубікамі і абкачайце ў любімых спецыях (напрыклад, у сумесі солі, перцу і салодкай папрыкі). Разагрэйце алей у патэльні і абсмажце папярэдне звараную курыную грудку. Нарэжце сыр камамбер на кавалачкі, а агурок і моркву — як саломку. Пакладзіце ў міску звараны рыс, смажаную курыцу, сыр і гародніну. Усё гэта пасыпце кунжутам.

Боўл з ласосем і печанай бульбай

• 100 г ласося
• 60 г мацарэлы
• 140 г бульбы
• 1 памідор
• 4 спаржы
• жменя рукалы
• 10 г аліўкавага алею
• спецыі

Ласося вымыйце, зрэжце скурку і пасыпце спецыямі (напрыклад, салодкай папрыкай, соллю і перцам), а затым загарніце ў алюмініевую фольгу. Бульбу памыйце, нарэжце кавалачкамі і пакладзіце ў міску — дадайце аліўкавы алей і любыя спецыі (напрыклад, для бульбы), старанна змяшайце і выкладзіце на бляху, засланую паперай для выпечкі. Спаржу вымыйце, адламайце цвёрдыя канцы і выкладзіце на бляху — запякайце ўсё гэта каля 25 хвілін пры 220 градусах. Па заканчэнні гэтага часу дадайце ласося і запякайце яшчэ 15 хвілін пры 180 градусах. Тым часам падрыхтуйце памідоры: вымыйце і нарэжце іх кубікамі, а мацарэлу нарэжце лустачкамі. Пакладзіце ў міску па жмені рукалы, памідораў, мацарэлы і запечанай спаржы, бульбы і ласося.

Боўл з фалафелем і «бульбай фры» з батату

• 100 г батату (1/2 шт.)
• 50 г фалафелю
• 10 г аліўкавага алею
• 1 памідор
• 1 агурок
• 2 сталовыя лыжкі кукурузы
• 1/2 кабачка
• спецыі

Вы можаце прыгатаваць фалафель самастойна або купіць гатовы.

Батат вымыйце, ачысціце і нарэжце як на бульбу фры. Нарэжце кабачок лустачкамі. Высыпце бульбу фры і лустачкі кабачка ў міску, дадайце аліўкавы алей і спецыі (напрыклад, соль, перац, салодкую папрыку, грануляваны часнок), усё старанна змяшайце і выкладзіце на бляху, засланую паперай для выпечкі. Выпякайце каля 25 хвілін пры 220 градусах. Па заканчэнні гэтага часу дадайце фалафель і злёгку апырскайце іх аліўкавым алеем. Выпякайце яшчэ 15 хвілін пры 180 градусах. Тым часам прыгатуйце дабаўкі: памідор нарэжце кубікамі, агурок — палоскамі. Пакладзіце ў міску кукурузу, нарэзаную гародніну і запечаныя фалафель, батат і кабачок.

Больш рэцэптаў:

Фалафель: вы думаеце, што гэта складана — ані!

Што прыгатаваць? Фаршыраваныя кабачкі — сытнае і духмянае гарачае

Стронга, фаршыраваная булгурам, з гароднінай і мятным ёгуртам

• 13
• 0
• 0
• 3
• 3
• 2
• 3
• 0