У кібуцы Беэры на мяжы з сектарам Газа знайшлі целы 100 загінулых ізраільцян. Колькасць ахвяр можа павялічыцца
Валанцёры пошукава-выратавальнай групы Zaka выявілі найменей целы 100 загінулых ізраільцян у кібуцы Беэры, размешчаным недалёка ад мяжы з сектарам Газа, паведамляе «Медуза» са спасылкаю на The Times of Israel.
Па словах аднаго з мясцовых жыхароў, кібуц быў цалкам разбураны ў выніку нападу баевікоў ХАМАС.
Усяго ў кібуцы пражывалі каля тысячы чалавек. Валанцёры не выключаюць, што колькасць загінулых можа яшчэ павялічыцца, бо не ўсе завалы разабралі.
Ізраільскія СМІ паведамлялі, што ў выніку атакі ХАМАС у краіне загінулі не менш за 900 чалавек і яшчэ 2400 атрымалі раненні.
Адной з першых мэтаў тэрарыстаў, якія напалі на Ізраіль раніцай 7 кастрычніка, стаў музычны фестываль Universo Paralello Israel Edition, які праходзіў за пяць кіламетраў ад сцяны, якая аддзяляе ізраільскую тэрыторыю ад сектара Газа. Па даных пошукава-выратавальнага гурта Zaka, у выніку нападу баевікоў на фестываль загінулі сама меней 260 чалавек.
Каментары