«Амерыка, я аддаў табе ўсе сілы». З'езд Дэмпартыі сустрэў прамову Байдэна бурнымі авацыямі, і той пусціў слязу
Прэзідэнт ЗША зрабіў кранальную развітальную прамову і быў ушанаваны бурнымі авацыямі на нацыянальным з'ездзе Дэмакратычнай партыі ў Чыкага. Выступу папярэднічала нечаканае з'яўленне на сцэне Камалы Харыс, якая падзякавала яму за тое, што ён быў «неверагодным» прэзідэнтам, піша Бі-бі-сі.
«Джо, дзякуй Вам за ваша гістарычнае лідарства, за тое, што вы ўсё жыццё служылі нашай нацыі, і за ўсё, што вы працягваеце рабіць, — сказала яна. — Мы вам вечна ўдзячныя».
«Я люблю вас», — пусціў слязу, звярнуўшыся да прысутных, 81-гадовы прэзідэнт пад аглушальныя апладысменты.
«Мы любім цябе, Джо» — скандавалі сябры партыі, якая месяц таму прымусіла яго адмовіцца ад прэтэнзій на прэзідэнцкую намінацыю праз ягоны ўзрост.
«Мы абое ведаем, што нам трэба будзе яшчэ шмат зрабіць, але мы рухаемся ў правільным кірунку», — сказаў Байдэн, маючы на ўвазе сябе і Харыс, якая за некалькі тыдняў здолела перавярнуць ход прэзідэнцкай гонкі.
Першая чарнаскурая жанчына, якая стала віцэ-прэзідэнтам Амерыкі, Камала Харыс удыхнула новае жыццё ў Дэмакратычную партыю і абышла лідара рэспубліканцаў Дональда Трампа ў апытаннях грамадскай думкі.
Байдэн прыйшоў на з'езд з сям'ёй: жонкай Джыл і дачкой Эшлі.
У сваёй прамове Байдэн не толькі казаў пра сваё месца ў гісторыі, але і аддаў належнае свайму віцэ-прэзідэнту — жанчыне, якая, як ён спадзяецца, зменіць яго ў Белым доме.
«Выбар Камалы быў самым першым рашэннем, якое я прыняў, стаўшы нашым кандыдатам [на мінулых выбарах], і гэта найлепшае рашэнне, якое я прыняў за ўсю сваю кар'еру, — сказаў ён. — Яна строгая, дасведчаная і неверагодна сумленная».
Дэмакраты ў Чыкага знаходзяцца ў прыўзнятым настроі, спадзеючыся на перамогу ў лістападзе, што здавалася неймаверным усяго некалькі тыдняў таму пасля правальных дэбатаў Байдэна з Трампам.
Апладысменты ў адрас прэзідэнта можна расцэньваць і як знак падзякі за яго рашэнне выйсці з прэзідэнцкай гонкі, і як даніну павагі да яго багатай палітычнай кар'еры, якая пачалася ў 1972 годзе, калі ён упершыню быў абраны ў Кангрэс ва ўзросце 29 гадоў.
Хоць Байдэн прысвяціў заканчэнне сваёй прамовы Камале Харыс, многія з выступоўцаў у гэты вечар адрасавалі свае прывітанні цяперашняму гаспадару Белага дома.
Хілары Клінтан, з'явіўшыся на сцэне ў пачатку вечара, сказала прысутным, што містэр Байдэн «вярнуў у Белы дом годнасць, прыстойнасць і кампетэнтнасць».
У аўторак перад удзельнікамі з'езду выступіць Барак Абама. У сераду прыйдзе чарга Біла Клінтана. Абодва яны — былыя прэзідэнты, якія вылучалі сваю кандыдатуру на перавыбранне і перамаглі. У Байдэна такой магчымасці не будзе. Яго прамова на з'ездзе, калі ў найбліжэйшыя пяць месяцаў не здарыцца нічога экстраардынарнага, стане апошнім зваротам прэзідэнта да масавай амерыканскай тэлеаўдыторыі.
Па паведамленнях амерыканскай прэсы, Байдэн усё яшчэ адчувае расчараванне з-за таго, што яго вымусілі саступіць дарогу Харыс — ён лічыць, што змог бы перамагчы Трампа. Але ён сцвярджае, што прымірыўся з гэтым рашэннем.
Завяршыўшы прамову — ужо пасля апоўначы на ўсходнім узбярэжжы ЗША — прэзідэнт пакінуў з'езд і накіраваўся ў Каліфорнію на адпачынак.
Пракурорскі начальнік абурыўся неабгрунтаванымі затрыманнямі беларусаў9
Каментары