Спартыўная газета «Прессбол» з ліпеня ператворыцца ў штотыднёвы 16-старонкавы нумар. Кошт аднаго нумара складзе 12 рублёў. Абяцаюць, што гэта будзе нешта накшталт часопіса.
«Бязлітасны час дыктуе свае патрабаванні, і ў няроўнай барацьбе за аператыўнасць з электроннымі носьбітамі мы вырашылі, што газеце патрэбныя змены. Як якасныя, так і візуальныя.
Таму яна ператворыцца ў падабенства штотыднёвага часопіса на 16 старонках. Багата ілюстраванага, з вялікім наборам аналітычных матэрыялаў, інтэрв’ю з вядучымі беларускімі спартсменамі і трэнерамі, аповедамі пра лёс ветэранаў, якія на працягу доўгіх гадоў прыносілі славу айчыннаму спорту, рэпартажаў з чэмпіянатаў свету, Еўропы і Алімпійскіх гульняў.
Улічваючы нашы цесныя партнёрскія адносіны з АБФФ, менавіта найпапулярнейшаму віду спорту ў свеце будзе аддадзена перавага.
Тым больш што летам і восенню міжнародны каляндар прапануе заўзятарам шмат цікавага — ад еўракубкаў да ўдзелу зборнай Беларусі ў кваліфікацыйным раўндзе ЧС-2026.
Аднак не будуць забыты і іншыя віды спорту, дзе нашы суайчыннікі прадэманструюць высокія вынікі.
Каб захаваць пераемнасць, газета як і раней будзе з’яўляцца ў паштовых скрынях нашых верных чытачоў і паступаць у продаж праз кіёскі «Саюздруку» па аўторках, — гаворыцца ў паведамленні.
***
«Прессбол» быў заснаваны незалежнымі журналістамі, першы нумар выйшаў 16 студзеня 1991 года на васьмі старонках, потым выдаваўся на 16 старонках. У сярэдзіне 1990-х газета выходзіла двойчы на тыдзень: у аўторак на 32 старонках, у пятніцу на васьмі.
У канцы 1990-х газета перайшла на фармат чатыры разы на тыдзень, нейкі час выдавалася шэсць разоў на тыдзень.
Апошнія гады выходзіла два разы тыдзень (аўторак, пятніца) па 16 старонак. Яго папяровы наклад складае некалькі тысяч асобнікаў.
Цяпер чытаюць
Колькі беларусаў галасавала за Лукашэнку на ранейшых выбарах? Апублікаваныя закрытыя лічбы дзяржаўных апытанняў18
Каментары