Пяць пытанняў, якія застаюцца пасля смерці экс-выкладчыка БНТУ Шчукіна, што ўцякаў ад міліцыі

Самая загадкавая тэма апошніх дзён у Беларусі — смерць 47-гадовага выкладчыка БНТУ Міхаіла Шчукіна. Нагадаем паслядоўнасць падзей. Увечары 28 мая ў тэлеграм-канале «Мінчанін» было апублікавана 10-секунднае відэа, знятае ва ўнутраным дворыку БНТУ. На ім мужчына вырываецца і спрабуе ўцячы ад некалькіх ахоўнікаў. Што адбывалася далей, невядома, але ў тым жа допісе апублікавана фота, як гэты мужчына ляжыць мёртвым, накрыты белай прасцінай.

На наступны дзень, пасля таго як інфармацыя стала разлятацца па сацсетках, адрэагавалі прапагандысты і сілавікі.

У блізкім да ўладаў канале «Народны антыфэйк» было выстаўлена васьмісекунднае відэа, на якім некалькі міліцыянераў (ці ахоўнікаў) бягуць услед за мужчынам, фактычна суправаджаючы яго. Ролік абрываецца на моманце, калі мужчына дабягае да асфальту, на якім прыпаркаваныя аўтамабілі.

У міліцэйскім канале «Адваротны бок» апублікавана фота таго, як той самы мужчына стаіць на ганку ўніверсітэта, а побач з ім чацвёра сілавікоў і трое ў цывільным.

Былі апублікаваныя і два скрыншоты перапіскі Шчукіна са студэнткамі.

Павялічыць

Павялічыць

Таксама ў канале «Міліцыя Мінска» з’явілася відэа, на якім прадстаўнік сілавікоў тлумачыў сваю версію таго, што адбылося. Маўляў, былы выкладчык спрабаваў трапіць у ВНУ, зладзіў канфлікт з адміністрацыяй. Калі прыехала міліцыя, то Шчукін нанёс некалькі ўдараў праваахоўнікам і спрабаваў уцячы.

Ва ўсёй гэтай гісторыі застаецца шмат недагаворанага. Адказу на шмат якія пытанні пакуль няма.

Павялічыць

1) Чаму апублікавана толькі восем секунд пагоні?

На студэнцкім відэа выкладчык у шапцы і куртцы выбягае з 11 корпуса БНТУ (факультэт інфармацыйных тэхналогій і робататэхнікі) і ўцякае ад траіх сілавікоў, адзін з іх з аўтаматам. Пасля ён зафіксаваны ва ўнутраным двары каля помніка. Памёр Шчукін на паркоўцы каля 9 корпуса. Агулам ён і сілавікі прабеглі каля 400 метраў. Гэта насамрэч немалая адлегласць, каб яе пераадолець, немаладому выкладчыку трэба 3-4 хвіліны.

З улікам таго, што міліцыянеры маюць нагрудныя відэакамеры, незразумела, чаму апублікаваны толькі восем секунд пагоні. Няма ні пачатку канфлікту — каб зразумець, пра што размаўлялі сілавікі з выкладчыкам, чаму ён вырашыў бегчы, — ні апошніх момантаў пагоні — калі, як мяркуецца, Шчукін упаў з сардэчным прыступам.

2) Дзе ўдары па міліцыянерах?

Міліцыя сцвярджае, што экс-выкладчык аказваў супраціў і нанёс некалькі ўдараў міліцыянерам. Але на якім этапе? Перад тым, як кінуўся на ўцёкі? У канцы, калі яго дагналі? МУС не прыводзіць ніводнага доказу «супраціву», ні на адным кадры ўдараў не відаць.

Калі «ўдарамі» лічыцца той стартавы момант са студэнцкага відэа, калі Шчукін выкручваецца і пачынае бегчы, то гэта ў чарговы раз дэманструе хлусню з боку МУС. 

3) Чаму міліцыя наўмысна апускае факт смерці выкладчыка?

У расповедзе на абодвух міліцэйскіх каналах ні разу не згадваецца пра тое, што ў выніку інцыдэнту выкладчык памёр. Міліцэйская праверка насамрэч павінна праводзіцца — але перадусім па факце смерці чалавека. А ў прэс-рэлізе сілавікоў гаворка пра іншае.

«Невыкананне законных патрабаванняў супрацоўніка органаў унутраных спраў пры выкананні ім службовых абавязкаў цягне за сабой устаноўленую законам адказнасць», — падкрэсліваецца там. Гучыць як здзек — да якой адказнасці вы прыцягнеце мёртвага Шчукіна?

4) Прыйшоў да студэнткі ці да адміністрацыі?

У прапагандыстаў з «Народнага антыфэйка» расказваецца, што паміж Шчукіным і адной са студэнтак адбыўся канфлікт, пасля чаго, маўляў, былі выкліканыя супрацоўнікі службы бяспекі.

У міліцэйскім «Адваротным баку» іншая праўда: «Мужык са звальненнем не пагадзіўся і на працягу тыдня спрабаваў незаконна прарвацца ў навучальную ўстанову, патрабуючы даць магчымасць прадоўжыць праводзіць заняткі. Калі ён канчаткова ўсіх дастаў, супрацоўнікі службы аховы ВНУ выклікалі міліцыю, каб суцішыць скандаліста».

Якая з версій праўдзівая? І адкуль узялася іншая?

5) Як і калі звальнялі Шчукіна?

Змест апублікаваных скрыншотаў перапіскі выкладчыка і студэнтак пачварны. Аднак калі яны праўдзівыя, то атрымліваецца, што кіраўніцтва ўніверсітэта заплюшчвала вочы на паводзіны Шчукіна. Ён працаваў 10 гадоў, быў загадчыкам кафедры — і ніякай інфармацыі пра дысцыплінарныя спагнанні за дамагальніцтвы.

Гаворыцца, што яго нібыта звольнілі па сканчэнні кантракта. Але факт заканчэння кантракта выкладчыка пасярод навучальнага года выглядае дзіўным. Кантракты звычайна не падпісваюцца так, каб сканчвацца перад сесіяй.

***

Увечары 29 мая на старонках «Мінскай праўды» супрацоўнік Міністэрства адукацыі, прапагандыст Андрэй Лазуткін апублікаваў свае развагі па тэме. Дарэчы, яго і раней выкарыстоўвалі для падобных сітуацый — апублікаваць пазіцыю кіраўніцтва сістэмы адукацыі (асабліва калі міністрам быў Ігар Карпенка).

Лазуткін прызнае, што ў сітуацыі, калі выкладчык дамагаўся студэнткі, але не было складу злачынства (спробы згвалтавання ці распаўсюду парнаграфіі), то яго ціха звальняюць па згодзе бакоў.

Але цікавае не гэта: супрацоўнік Мінадукацыі намякае на тое, што міліцыянеры ўсё ж маглі прымяняць спецсродкі ў адносінах выкладчыка. «Трэба глядзець, ці ўжываліся ў дачыненні да Шчукіна спецсродкі і што сталася прычынай смерці — удар, падзенне, спыненне сэрца», — разважае Лазуткін.

• 2
• 0
• 4
• 12
• 4
• 1
• 14
• 0