12-разовы чэмпіён Беларусі па футболе, адзін з самых пазнавальных беларускіх футбалістаў Віталь Радзівонаў у інтэрв'ю «Беларускаму футболу» расказаў пра свой бізнэс.
Віталь скончыў футбольную кар'еру ў 2018 годзе, нейкі час працаваў у структуры БАТЭ, потым некалькі месяцаў быў начальнікам каманды «Энергетык-БДУ», але ў сакавіку 2020 года цалкам завязаў з футболам.
«Праз нейкі час пад руку трапіла магчымасць займацца гандлем спартыўнымі таварамі, у прыватнасці роварамі, прадстаўляць у нас у краіне адзін з сербскіх брэндаў. Сабраўшы пэўную інфармацыю пра гэта, вырашыў пайсці ў гэтым кірунку. І да гэтага часу ў гэтай прафесіі. На сёння мы прадстаўляем ужо не адзін велабрэнд, а некалькі. А ў таварнай лінейцы з’явіліся не толькі ровары, але і іншыя катэгорыі. На дадзены момант жыву гэтым», — расказаў Радзівонаў «Беларускаму футболу»
На пытанне, чаму ён заняўся не продажам футбольнай атрыбутыкі, а менавіта роварамі, Радзівонаў зазначыў, што былі людзі, якія на той момант падказалі пэўныя нюансы ў гэтай справе.
Зрэшты Віталь не называе гэта бізнэсам, а невялікай справай.
«Бізнэсам гэта пакуль называць рана, ён пачынаецца з чалавек 30 у штаце. Нас пакуль 15. Тым не менш, гэта справа прыносіць задавальненне і аб’ядноўвае добрых людзей побач, калі казаць пра наш калектыў», — кажа ён.
У яго кампаніі ёсць рознічныя крамы і склад. Адчынілася другая афлайн-крама са спецыялізацыяй на мотатэхніцы, водаматорыцы, электратранспарце і сэрвісным абслугоўванні. Ровары і электратранспарт — праспект Пераможцаў 84 — ГЦ «Арэна Сіці». Мота-, водаматорная тэхніка — Каліноўскага 6.
Радзівонаў рэгулярна бывае на кропках і нават здараецца, што наведнікі пазнаюць яго.
Здараецца, што карыстаюцца яго паслугамі былыя калегі па спорце — Максім Скавыш, Сяргей Яромка, Валерый Фамічоў.
За беларускім футболам Віталь сочыць краем вока. «Толькі дзякуючы таму, што маю пэўную ролю ў выглядзе вядзення футбалістаў. Стараюся за ім сачыць», — кажа ён.
Каментары