Кампанія «Віцебскія дываны» прэзентавала новую калекцыю, створаную «па матывах славянскага мастацтва». На дыванах — матрошкі і ўзоры хахламы. Навінка выклікала неадназначную рэакцыю ў сацыяльных сетках.
Новыя віцебскія дываны маюць круглую форму і памер метр на метр. Усяго шэсць дызайнаў: тры матрошкі і тры хахламы.
«Сакавітыя, яркія, дызайнерскія дываны. Вы іх можаце пакласці ў дзіцячы пакой ці выкарыстоўваць як вельмі яркі інтэр'ерны элемент», «Калекцыя з ноткамі настальгіі па дзяцінстве» —
сцвярджаюць у рэкламных роліках і паведамляюць, што новую прадукцыю можна набыць як праз сайт, так і ў фірменных крамах у Мінску.
Многіх збянтэжыла, што выбралі сімвалы, якія не асацыююцца з Беларуссю.
«А ці не лагічней спачатку вырабіць дываны з матывамі сваёй краіны?» —
задаюцца пытаннем у каментарах да рэкламы.
Нехта выказаўся больш эмацыйна:
«Вельмі дзіўна бачыць такі дызайн. Чаму не наша нацыянальная тэматыка? Нашы арнаменты нашмат прыгажэйшыя».
На гэтую заўвагу акаўнт «Віцебскіх дываноў» адказаў:
«Чым жа матрошкі не нацыянальны сімвал?»
Фабрыка заўважыла таксама, што ў іх ёсць і іншыя калекцыі.
Адзін з каментатараў дае разгорнутае тлумачэнне, чаму абраныя сімвалы не маюць дачынення да беларускай культуры:
«Матрошка — тыпова расейскі сувенір, які з’явіўся ў Падмаскоўі напрыканцы XIX стагоддзя. Хахлама — гэта расейскі народны роспіс з Ніжагародскай губерні (XVII стагоддзе).
У беларускай традыцыйнай культуры ёсць свае ўласныя сімвалы і рамёствы, якія ніяк не звязаныя з гэтымі расейскімі артэфактамі. Напрыклад, слуцкія паясы, саломапляценне, беларускія ручнікі з чырвона-белай вышыўкай, кераміка і арнаменты, што ідуць яшчэ з дахрысціянскіх часоў. Калі ласка, не выдавайце расейскую культуру за беларускую».
Некаторыя спрабуюць зразумець логіку вытворцы. Адно з меркаванняў — разлік на расійскі рынак.
«Бачу, што апошнім часам нашы вытворцы сталі арыентавацца на расійскіх пакупнікоў», «Для турыстаў з суседняй краіны», «Гэта, відаць, прадукцыя на экспарт».
А былі і тыя, каму новая калекцыя прыйшлася даспадобы:
«Класныя. Трэба браць!», «Вельмі сімпатычныя матрошкі! Такія пад ногі не кінеш!», «У мяне сын абажае матрошак. Мне такая патрэбная», «Так прыемна бачыць, што беларускія кампаніі сочаць за трэндамі і аператыўна выпускаюць навінкі».
Алімпійскі чэмпіён Арамнаў: Нам выгадная працяглая вайна, і Вова ды Саша ў ёй перамогуць14
Каментары