«Дачка падумала, што гэта аўчарка». Што вядома пра мядзведзяня, якое шастала раніцай па Віцебску
Сёння раніцай гарадскія паблікі Віцебска апублікавалі відэа, на якіх знята мядзведзяня, якое бегала проста па вуліцах горада. Многія засумняваліся, што гэта праўда, але ў МНС пацвердзілі, што ад мясцовых жыхароў паступала такое паведамленне, пiша Onliner.by.
Раніцай чацвярга ў раёне вуліцы Праўды ў Віцебску людзі заўважылі мядзведзяня і паспелі зняць гэты момант. Звер лёгка перабягае праезную частку прама па пешаходным пераходзе, побач спакойна ідуць людзі. «Як быццам побач заяц прабег, а не мядзведзь», — пішуць у каментарах мясцовага пабліка.
Запіс можна было паставіць пад сумнеў. Паколькі ў каментарах хтосьці напісаў, што мядзведзяня спрабуюць злавіць нібыта супрацоўнікі МНС, мы звярнуліся ў ведамства за каментаром.
— Раніцай сапраўды паступала паведамленне аб тым, што па горадзе бегае мядзведзяня. Ратавальнікі выязджалі на месца, але, паколькі там ужо нікога не было, яны вярнуліся назад, — расказалі ў ведамстве.
Ратавальнікі не займаюцца адловам мядзведзяў.
Журналістам удалося пагаварыць з мамай дзяўчыны, якая зняла відэа з мядзведзянём.
— Каля васьмі раніцы мая дачка адвяла дзіця ў садок і вяртаючыся дадому, сустрэла мядзведзяня, якое прабегла ледзь не каля яе ног. Спачатку яно кідалася ў двары нашага дома па вуліцы Праўды, 58, потым пабегла да плота воінскай часткі. Мядзведзяня было невялікае, ростам з аўчарку. Дачка спачатку і падумала, што гэта сабака, і толькі калі ён падбег да яе амаль ушчыльную, зразумела, што гэта зусім не так, — расказала віцяблянка Ірына.
— За паўтара кіламетры ад нас размешчаны заапарк, і мы думаем, што звер, магчыма, збег адтуль. Пасля да нас прыязджала машына МНС, мы паказвалі напрамак, у якім уцёк мядзведзяня, але чым усё скончылася, не ведаем.
Цяпер чытаюць
«Рэтранслятары выключыць, зняць і паказаць нам, што яны знятыя». Зяленскі патлумачыў, чаму паставіў ультыматум і што мае зрабіць Мінск45
Каментары