Стала вядома, які прысуд вынеслі жанчыне з Мазыра, затрыманай на выхадзе з анкалагічнага дыспансера
Праваабаронцы даведаліся, які прысуд вынеслі жыхарцы Мазыра Ірыне Левінай, якую летась затрымалі на выхадзе з анкалагічнага дыспансера. Яе справу разглядаў Гомельскі абласны суд, піша «Гомельская вясна».
Жанчыну абвінавацілі ў садзейнічанні экстрэмісцкай дзейнасці паводле частак 1 і 2 артыкула 361‑4 Крымінальнага кодэкса. Паводле версіі следства, яна перадавала інфармацыю маніторынгаваму тэлеграм-каналу «Беларускі Гаюн», які адсочваў перамяшчэнні расійскіх войскаў у Беларусі перад і падчас вайны супраць Украіны.
Як стала вядома праваабаронцам, Ірыне Левінай прызначылі чатыры гады абмежавання волі без накіравання ў папраўчую ўстанову («хатняя хімія»), а таксама штраф сумай 500 базавых адзінак.
Раней паведамлялася, што з-за крымінальнага пераследу жанчына не магла паўнавартасна праходзіць лячэнне анкалагічнага захворвання. Праваабаронцы спрабуюць высветліць, у якім стане яна знаходзіцца цяпер.
Каментары