КДБ прыходзіў да родных яшчэ аднаго віцебскага актывіста. Правялі ператрус
Папярэдзілі, каб не ўдзельнічалі ў мерапрыемствах да Дня палітвязня.
У Беларусі прайшла хваля ператрусаў у сваякоў грамадскіх актывістаў і праваабаронцаў, якія былі вымушаны з'ехаць за мяжу. Стала вядома, што 21 мая супрацоўнікі КДБ прыходзілі з вобшукам да родных віцебскага актывіста Дзмітрыя Карняенкі.
Пра гэты візіт і яго сапраўдныя прычыны актывіст напісаў на сваёй старонцы ў Facebook: «Афіцыйна — з нагоды святкавання Дня Волі. Неафіцыйна — каб у гэты дзень не выходзілі на жалобныя мерапрыемствы, прысвечаныя Дню палітвязня».
Паводле слоў Карняенкі, падчас гэтага ператрусу сілавікі нічога не забралі.
Аднак ён адзначыў, што прадстаўнікі спецслужбаў прыходзяць да яго блізкіх у Беларусі «як на працу». Родныя падвяргаюцца пастаяннаму ціску: напрыклад, у бацькі Дзмітрыя ўжо двойчы прымусова бралі ўзор ДНК.
У Беларусі супраць самога Дзмітрыя Карняенкі распачата некалькі крымінальных спраў, а МУС унесла яго ў спісы ўдзельнікаў «экстрэмісцкіх фармаванняў» за дачыненне да праекта «Хрысціянская візія» і віцебскай ініцыятывы «Народны дэпутат».
Ператрус у сваякоў Карняенкі не быў адзінкавым выпадкам. 21 мая сілавікі зладзілі масавы рэйд па родных тых беларусаў, хто знаходзіцца ў эміграцыі і займаецца праваабарончай ці грамадскай дзейнасцю. Сярод іншага, вобшук прайшоў і ў сваякоў праваабаронцы Праваабарончага цэнтра «Вясна» Уладзіслава Лабковіча.
Цяпер чытаюць
«Я еду натхніцца ўкраінцамі». Святлана Ціханоўская пачала афіцыйны візіт ва Украіну15
Каментары