Беларускі бізнэсмен праспансаваў чэмпіянат свету па хакеі ў Швейцарыі
Кампанія «Шатэ-М Плюс», якой валодае беларускі бізнэсмен Канстанцін Шавель, стала спонсарам чэмпіянату свету па хакеі-2026, які праходзіць у гэтыя дні ў Швейцарыі, піша выданне «Белорусы и рынок».
Брэнд аўтазапчастак Patron упрыгожвае арэны ў Цюрыху і Фрыбургу нароўні з забароненымі ў Беларусі Škoda і Liqui Molly. Таксама сярод спонсараў сусветнага хакейнага першынства такія брэнды, як Tissot, Wuert, Sika, Swiss Air, Nike, Nokian Tyres, Allegro і іншыя.
У Канстанціна Шавеля, які ўваходзіць у топ-100 паспяховых бізнесмэнаў Беларусі 2025 года, ёсць таксама буйны бізнэс у Расіі. Але ў Швейцарыі яго брэнд Patron прадстаўляюць не беларуская і расійская кампаніі, а дачка з Казахстана — «Шатэ-М Плюс» з Астаны. Хоць сама зборная Казахстана гэтым разам не выступае ў Швейцарыі — яна летась пакінула вышэйшы дывізіён. Patron з'яўляецца партнёрам Міжнароднай федэрацыі хакея на лёдзе (ІІХФ) ужо дзесяць гадоў — з 2016 года.
Група кампаній «Шатэ-М Плюс» — гэта адзін з найбуйнейшых у Беларусі, Расіі і Казахстане дыстрыб'ютараў аўтамабільных запчастак. Частка з іх вырабляецца пад уласным брэндам Patron на партнёрскіх прадпрыемствах. Як паведамляецца на сайце кампаніі, гэта 70 заводаў, размешчаных у Кітаі, Паўднёвай Карэі, Турцыі, Бельгіі, Італіі, Расіі, Беларусі, Тайвані, Малайзіі, Літве, Венгрыі і Польшчы.
Каментары