Тэрарыстычная арганізацыя пачала кампанію ў падтрымку пілота авіякампаніі Flydubai, які з дапамогай сякеры спрабаваў захапіць пасажырскі лайнер. У публікацыях гучаць прамыя заклікі да паўтарэння падобных нападаў на амерыканскіх і ізраільскіх грамадзян у паветры.
Як піша выданне New York Post, заклік з'явіўся ў штотыднёвым выданні al-Bayan, якое падтрымлівае «Аль-Каіду». У артыкуле на арабскай мове праводзіцца прамая паралель паміж тэрактамі 11 верасня 2001 года і няўдалай спробай згону рэйса FZ1073 30 верасня 2026 года. Аўтары публікацыі выкарысталі фатаграфіі атакі на вежы-блізняты разам са здымкамі нядаўняга інцыдэнту.
«Вайна яшчэ не скончаная — самалёты з сіяністамі, амерыканцамі і ўсімі іншымі нявернымі, якія ваююць супраць ісламу, усё яшчэ лунаюць у небе і могуць стаць мішэнямі, як гэта адбылося 11 і 30 верасня», — гаворыцца ў тэксце. Далей дадаецца, што «надыдзе дзень, калі імперыя зла Амерыка скончыць сваё існаванне».
29‑гадовы аманскі другі пілот Хамам аль-Хамамі быў арыштаваны пасля таго, як з дапамогай сякеры напаў на капітана і паспрабаваў узяць кіраванне рэйсам Дубай — Тэль-Авіў пад свой кантроль. Экіпаж і пасажыры здолелі абясшкодзіць нападніка. Лайнер быў перанакіраваны ў Табук (Саудаўская Аравія), дзе паспяхова прызямліўся дзякуючы двум іншым пілотам Flydubai, якія знаходзіліся на борце.
Генеральны пракурор ААЭ Хамад Саіф Аль-Шамсі афіцыйна пацвердзіў, што следства кваліфікуе дзеянні затрыманага як спробу здзяйснення тэрарыстычнага акта.
Эксперт па тэрарызме Эван Колман адзначае, што новыя дэталі паказваюць на сувязь аль-Хамамі менавіта з «Аль-Каідай», а не з «Ісламскай дзяржавай».
Праз дзевяць гадзін пасля затрымання пілота, калі ён ужо знаходзіўся пад вартай, на яго старонках у LinkedIn і Instagram з'явілася серыя відэаролікаў. Хто менавіта апублікаваў матэрыялы — невядома, але пазней акаўнты былі выдаленыя.
Відэа ўтрымлівалі кадры з кабіны пілотаў з набліжэннем ізраільскіх самалётаў, а таксама выяву забітага ў 2022 годзе лідара «Аль-Каіды» Аймана аз-Завахіры. Акрамя таго, у публікацыях прысутнічала адсылка да Хумама аль-Балаві — урача і агента іарданскай разведкі, які аказаўся прыхільнікам «Аль-Каіды» і здзейсніў маштабны тэракт-самападрыў супраць супрацоўнікаў ЦРУ. Па словах Колмана, аль-Хамамі таксама меў прафесійны бэкграўнд у авіяцыі, што робіць параўнанне з аль-Балаві асабліва паказальным.
Ізраільскі Channel 12 са спасылкай на крыніцы ў следстве паведаміў, што аль-Хамамі быў радыкалізаваны менавіта ў межах ідэалогіі «Аль-Каіды». Папярэдне паведамлялася, што яшчэ падчас працы ў Oman Air у тэлефоне пілота знаходзілі экстрэмісцкія матэрыялы, з-за чаго яго палёты абмяжоўваліся. Упраўленне транспартнай бяспекі ЗША (TSA) заявіла, што каардынуе дзеянні з праваахоўнымі органамі і міжнароднымі партнёрамі, аднак прамых доказаў таго, што аль-Хамамі дзейнічаў наўпрост па загадзе тэрарыстычнай групоўкі, пакуль не апублікавана. Спецслужбы ААЭ працягваюць высвятляць, ці меў нападнік саўдзельнікаў і знешняе кіраўніцтва.
-
Слон з мёртвым сланянём, каёт у Сан-Францыска, пума на агароджы… Вось якія работы сталі сёлетнімі пераможцамі конкурсу «Фатограф года дзікай прыроды»
-
Ілан Маск: Starlink нельга выкарыстоўваць для наступальных дзеянняў, а хуткасць і параметры вайсковых тэрміналаў вызначаюць Пентагон і Трамп
-
Для ўезду ў Казахстан беларусам трэба будзе запытваць пропуск за тры дні
У Эстоніі арыштаваны Алег Маісееў, кажуць яго знаёмыя. Гэта былы кіроўца Ціханоўскай, які з часам стаў яе зацятым крытыкам23
Каментары
Лявацтва - гэта не прагрэс, гэта культ смерці. Кожны лявак, як дарываецца да ўлады, пачынае заганяць народ у свой дэлірыюм, і калі не атрымліваецца, з'яўляюцца канцлагеры і масавыя магілы.
Таму ісламісты і сацыялісты - натуральныя хаўруснікі, бо мрояць забіць усіх, хто не замбаваны іх ідэялогіяй.