У калумбійскім горадзе Калі ратавальнікі знайшлі жывым двухмесячнае дзіця пад заваламі пасля разбуральнага землятрусу.
Хлопчык выжыў дзякуючы бацьку, які гадзінамі трымаў яго ля грудзей і сваім целам абараняў ад бетонных канструкцый, якія падалі, піша Bild.
Падчас пошукавай аперацыі ратавальнікі пачулі плач з-пад абломкаў. Двое паліцэйскіх разам з мясцовымі жыхарамі пачалі разбіраць завалы, нягледзячы на небяспеку: побач адчуваўся моцны пах газу. Пад абрынутымі плітамі яны знайшлі мужчыну, якога заваліла абломкамі, але ён працягваў прыціскаць сына да сябе.
«Ён прасіў нас толькі пра адно — не даць яго дзіцяці памерці», — распавёў адзін з паліцэйскіх.
Бацька і двухмесячны Саламон выжылі, аднак маці дзіцяці і яго дзядзька пакуль лічацца зніклымі без вестак.
Землятрус магнітудай 7,4 адбыўся ў Калумбіі ў панядзелак, 10 жніўня. Паводле афіцыйных звестак, загінулі не менш за 240 чалавек, яшчэ каля 2600 атрымалі траўмы. Ратавальнікі працягваюць шукаць тых, хто выжыў, хоць эксперты папярэджваюць, што пасля 72 гадзін шанцы знайсці людзей пад заваламі значна зніжаюцца.
Каментары