Адправілі ў адстаўку дыпламата Дапкюнаса, які два месяцы таму выступіў з хамскай прамовай у АБСЕ
Аляксандр Лукашэнка падпісаў указ, паводле якога Андрэй Дапкюнас вызвалены ад пасады надзвычайнага і паўнамоцнага пасла Беларусі ў Аўстрыі і па сумяшчальніцтве ў Славеніі.
Таксама Дапкюнас вызвалены ад пасады пастаяннага прадстаўніка Беларусі пры міжнародных арганізацыях у Вене і па сумяшчальніцтве пры Арганізацыі па бяспецы і супрацоўніцтве ў Еўропе (АБСЕ).
Прычынай вызвалення ад пасадаў названы выхад Дапкюнаса ў адстаўку.
На дыпламатычнай службе Дапкюнас быў ад пачатку беларускай незалежнасці — ад 1992 года.
Паслом Беларусі ў Аўстрыі і Славеніі, а таксама пастаянным прадстаўніком Беларусі пры міжнародных арганізацыях у Вене і пры АБСЕ ён быў прызначаны ў ліпені 2020 года. Перад тым з 2017 па 2020 год ён займаў пасаду намесніка міністра замежных спраў Беларусі. А яшчэ перад тым, з 2004 года, Дапкюнас працаваў пастаянным прадстаўніком Беларусі ў ААН.
Андрэю Дапкюнасу 63 гады, ён нарадзіўся ў Мінску, паходзіць з інтэлігентнай сям’і. Ягоны бацька — вядомы тэатральны дзеяч, працаваў у Міністэрстве культуры, Купалаўскім тэатры. Ягоная мама ўзначальвала музей Янкі Купалы.
Цікавым з’яўляецца той факт, што Андрэй Дапкюнас з’яўляецца сваяком Янкі Купалы. Ягоная мама — Жанна Дапкюнас — з’яўляецца ўнучатай пляменніцай вялікаму паэту. Прабабуляй Андрэя Дапкюнаса была Леакадзія (Лёля) Раманоўская — родная сястра Янкі Купалы.
Пасля 2020 года Дапкюнас быў падкрэслена лаяльны да рэжыму і на міжнародных пляцоўках выступаў у яго абарону вельмі актыўна і нават агрэсіўна. Так, у канцы чэрвеня гэтага года, пасля таго, як прэзідэнт Украіны Уладзімір Зяленскі паставіў Аляксандру Лукашэнку ультыматум і часова дабіўся адключэння на тэрыторыі Беларусі расійскіх рэтранслятараў для дронаў, Андрэй Дапкюнас выступіў у АБСЕ з настолькі хамскай у дачыненні да Украіны прамовай, што нават афіцыйная дзяржпрэса праз нейкі час выдаліла яе тэкст са сваіх пляцовак.
У сваім выступленні ён сярод іншага заявіў, што Украінай кіруе «містэр Бін пад крэкам». Таксама Дапкюнас назваў прэзідэнта Украіны Уладзіміра Зяленскага «фактычным кіраўніком Украіны» і параўнаў яго з жывёлай, назваўшы «гадаванцам Еўропы».
Цяпер чытаюць
Памятаеце вар’яцкую гонку ў Брэсце, падчас якой загінула трое? На ВІДЭА з экшн-камеры матацыкліста відаць, што ён разагнаўся да 186 км/г4
Каментары
[Зрэдагавана]
[Зрэдагавана]