ТАА «Трыёвіст», якое працуе пад брэндам анлайн-гіпермаркета 21vek.by, атрымала ліцэнзію на дзейнасць у сферы сувязі і запусціла ўласны сэрвіс па дастаўцы пасылак «21vek.by ПОШТА». Гэта першая ліцэнзія на паштовую дзейнасць, выдадзеная Міністэрствам сувязі і інфарматызацыі Беларусі за апошнія чатыры гады, піша Office Life.
Рашэнне аб выдачы ліцэнзіі было прынята яшчэ 15 чэрвеня, а 18 чэрвеня адпаведны запіс унеслі ў рэестр. Ліцэнзія дзейнічае на ўсёй тэрыторыі Беларусі.
На сайце новага сэрвісу ўжо даступная інфармацыя пра адрасы аддзяленняў і тарыфы. Па стане на пачатак кастрычніка ў Мінску і найбліжэйшых прыгарадах, у тым ліку ў Бараўлянах, Новай Баравой, Хацежыне і Заслаўі, працавала 21 аддзяленне паштовай сувязі.
Кошт перасылкі пасылак без аб'яўленай каштоўнасці залежыць ад іх вагі і спосабу дастаўкі.
Для фізічных асоб перасылка паміж аддзяленнямі каштуе ад 5,51 рубля за пасылку вагой да 1 кг да 39,90 рубля за пасылку вагой да 50 кг. Дастаўка да дзвярэй у Мінску і Мінскім раёне абыдзецца ад 22,90 да 34,20 рубля, а ў іншыя рэгіёны — ад 33,90 да 56,50 рубля. Гэтыя цэны пазначаныя без ПДВ.
Для юрыдычных асоб і індывідуальных прадпрымальнікаў адпраўка паміж аддзяленнямі каштуе ад 6,61 рубля за груз да 1 кг да 47,88 рубля за груз да 50 кг. Дастаўка да дзвярэй у сталічным рэгіёне каштуе ад 27,48 да 41,04 рубля, а ў іншых рэгіёнах — ад 40,68 да 67,80 рубля. У гэтых выпадках цэны пазначаныя з ПДВ.
У верасні 2024 года 21vek.by абвясціў аб супрацоўніцтве з «Белпоштай», дзякуючы якому планавалася пашырыць сетку пунктаў выдачы заказаў. Цяпер кампанія перайшла ад партнёрскай мадэлі да стварэння ўласнага паўнавартаснага паштовага аператара.
Цяпер чытаюць
А што будзе, калі вярнуцца ў Беларусь? Кажуць жа, што рэпрэсіі заканчваюцца3
Каментары