Chłopcaŭ zabrali za ŭkrainskija ściahi: «Milicyjanty nas abzyvali fašystami, banderaŭcami, pahražali kości łamać»
Prykładna a 17.30 udzielnika kurapackaha šeścia Alaksieja Dvareckaha adpuścili z Savieckaha RUUS. Jaho pratrymali ŭ milicyi kala dźviuch hadzin.
Paśla vyzvaleńnia Alaksiej raspavioŭ karespandentu Svabody, što schopleny byŭ jašče adzin udzielnik akcyi Fiodar Burak. Abodvuch źvinavacili ŭ tym, što jany nieśli ŭkrainskija ściahi padčas šeścia.
«Pytalisia, čaho my nieśli ŭkrainskija ściahi, nazyvali nas fašystami, banderaŭcami. Kazali, jedźcie na ŭschod. Jany matlali pierad tvaram niejkimi papierami, takim čynam pravakavali, pahražali, što buduć kości łamać, chapali za vałasy. Potym supakoilisia, niekudy syšli. Praź niekatory čas skazali, što nas vypuskajuć. Ale ŭ mianie zabrali stužki ź biełaruskim arnamientam, jakija ŭ kramie pradajuć, taksama bieł-čyrvona-biełyja ściahi. Pratakoły nie składali», — raspavioŭ Alaksiej.
Alaksiej skazaŭ, što supracoŭniki milicyi ŭ cyvilnym «paśvili» ich paśla zakančeńnia mitynhu ad samych Kurapataŭ, a kala Kamaroŭskaha rynku schapili i hruba paciahnuli ŭ mašynu.
«Z nami išoŭ taksama Juraś Bieleńki i jon skazaŭ milicyjantam, kali zatrymlivajuć mianie, to kab zatrymlivali i jaho. Adnak schapili tolki mianie i Fiodara, tych, chto nios ukrainskija ściahi».
Raniej «NN» paviedamlała pra sprobu zatrymańnia chłopca i dziaŭčyny, jakija taksama nieśli na šeści ŭkrainskija ściahi. Ale tych adbili udzielniki mitynhu, nie dazvolili «ludziam u čornym» schapić ich.
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury5
Kamientary