Kirył Silivončyk byŭ asudžany nie za ŭłasny dopis, a za pierapost — jaho novaja advakatka

Biełarus, jaki byŭ asudžany ŭ Rasii da dvuch hadoŭ kałonii-pasialeńnia za raźmiaščeńnie antyrasijskaha zapisu Ukantakcie, raskazaŭ svajoj novaj advakatcy, što kankretnyja słovy, za jakija jon byŭ asudžany, byli napisanyja nie im, a ŭtrymlivalisia ŭ repoście. Pra heta paviedamiła «Našaj Nivie» advakatka Śviatłana Łaktyjonava.

«Nie hetaja fraza była matyvam pierapostu», — skazaŭ Kirył Silivončyk novaj advakatcy. Adnak jon pryznaŭ svaju vinu i admoviŭsia ad abskardžvańnia prysudu.

Jon prosta nieabdumana źmiaściŭ u siabie na ścianie malunak, što jamu spadabaŭsia, i pad im byŭ nadpis, jaki jon nie zaŭvažyŭ.

Ź jahonych słovaŭ, jon uziaŭ hety malunak u hrupie «Ukrainska-biełaruskaje bractva» Ukantakcie. 

My šukali toj post u internecie, ale nie znajšli jaho ani na ścianie Silivončyka, ani ŭ kešy.

Silivončyk nie viedaje, ci moh toj post być pravakacyjaj. Jon raskazaŭ, što, pavodle jahonych źviestak z času śledstva, Ukrainska-biełaruskaje bractva źmiaščałasia ź biełaruskaha IR-adrasa, tamu było niedasiažnaje dla rasijskaha pravasudździa.

Sa słovaŭ advakatki Silivončyk viedaje, što hramadskaść i blizkija jaho padtrymlivajuć, i heta jaho vielmi trymaje ŭ duchu. Ani na zdaroŭje, ani na hvałt, ani na staŭleńnie administracyi jon nie skardzicca. Vyhladaje jon, pa słovach advakatki, narmalna. Jana taksama adznačyła, što heta čałaviek vysokaha intelektu. Jon byŭ uražany, što suajčyńniki apłacili jamu novaha advakata.

Novuju advakatku Silivončyku naniaŭ biełaruski chryścijanski aktyvist Andrej Kim, kali stała viadoma, što jahonaja advakatka z času pracesu była rekamiendavanaja FSB i raniej udzielničała ŭ inšych pracesach, inicyjavanych rasijskimi śpiecsłužbami.

Jak paviedamiła Śviatłana Łaktyjonava, kopii prysudu jana atrymać pakul nie zmahła, ale adpraviła taki zapyt.

Pravaabaronca Taćciana Hacura-Javorskaja nie biarecca aceńvać adekvatnaść abvinavačvańnia i pakarańnia, pakul my nie atrymajem poŭny tekst prysudu. Jana dziakuje Andreju Kimu: «Dziakujučy jamu ŭdałosia naniać novaha advakata i pačuć novuju infarmacyju. Važna, što biełarusy prajavili apieratyŭnaść i nieabyjakavaść».

Što da samoha Silivončyka, to Hacura-Javorskaja źviartaje ŭvahu na toje, što jon nie abskardžvaŭ prysudu. «Heta pazicyja darosłaha čałavieka, jaki adkazvaje za svaje dziejańni, i heta vyklikaje pavahu da hetaha biełarusa».

Kirył Silivončyk moh źviarnuć na svoj VK uvahu rasijskich śpiecsłužbaŭ, bo pracavaŭ sisadminam na abaronnym zavodzie ŭ Nižnim Noŭharadzie. Jon rodam z Homielščyny, i ŭ siabie Ukantakcie repościŭ šmat biełaruskich i ŭkrainskich patryjatyčnych materyjałaŭ. U adnym ź ich jon nie zaŭvažyŭ radykalnych zaklikaŭ. Jaho aryštavali ŭ śniežni 2014, u krasaviku 2015 jaho sudziŭ Maskoŭski vajskovy sud.

• 0
• 0
• 0
• 0
• 0
• 0
• 0
• 0