Dyrektaram minskaj biełaruskamoŭnaj himnazii pryznačyli dyrektara ruskamoŭnaj škoły
U piatnicu, 11 listapada ŭ Frunzienskim rajonnym sudzie adbudziecca pieršaje pasiedžańnie pa kryminalnaj spravie suprać byłoha dyrektara biełaruskamoŭnaj himnazii №4 Juryja Bandarenki.
Tym časam napiaredadni ŭ himnazii byŭ pradstaŭleny novy dyrektar. Im staŭ 37-hadovy Andrej Hocman. Da hetaha jon pracavaŭ dyrektaram u ruskamoŭnaj škole №38, što znachodzicca na vulicy Bielskaha.
Sam Andrej Hocman rodam ź Bierazina, tam jon skončyŭ piedahahičnuju himnaziju. Vučyŭsia ŭ pieduniviersitecie imia Maksima Tanka na nastaŭnika hieahrafii i bijałohii.
U škole nastaŭnikam prapracavaŭ, praŭda, zusim mała — usiaho dva hady. Spačatku jon byŭ u škole №199 (čatyry miesiacy), a paśla ŭ SŠ №11. U 2003 hodzie Andrej Hocman pierachodzić na pracu ŭ aparat BRSM. Jon stanovicca pieršym sakratarom Maskoŭskaj rajonnaj arhanizacyi BRSM.
U 2004—2007 Hocman pracavaŭ u Administracyi Maskoŭskaha rajona Minska. Zatym u karjery čynoŭnika adbyvajecca ŭzdym, jaho zabirajuć na pracu ŭ Ministerstva adukacyi, dzie jon stanovicca namieśnikam načalnika ŭpraŭleńnia.
U 2011—2012 Andrej Hocman pracavaŭ u Aparacie Savieta ministraŭ, vykonvaŭ funkcyi hałoŭnaha daradcy ŭpraŭleńnia sacyjalna-kulturnaj śfiery.
U 2012 čynoŭnika pieravodziać usiaho tolki dyrektaram SŠ №38, a ciapier jon uznačaliŭ biełaruskamoŭnuju ŭstanovu adukacyi.
Himnazija №4 znachodzicca ŭ minskim mikrarajonie Kuncaŭščyna.
Kamientary